مەملەكەتتىك باعدارلاما «سەرپىن-2050» اياسىندا دا جاستاردىڭ ءبىلىم الۋىنا قولداۋ كورسەتىلۋدە - ن. نازاربايەۆ

استانا. قازاقپارات - ەلباسى پاۆلودار مەملەكەتتىك پەداگوگيكالىق ينستيتۋتى جاتاقحاناسىنىڭ جاڭا عيماراتىن ارالاپ كوردى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى عيماراتتى ارالاپ كورىپ شىعىپ، وندا تۇرىپ جاتقان «سەرپىن-2050» باعدارلاماسىمەن ءبىلىم الاتىن ستۋدەنتتەرمەن اڭگىمەلەستى.

قازاقستان پرەزيدەنتى جاتاقحانادا تۇرمىسقا، تىنىعۋعا بارلىق جاعداي جاسالعاندىعىن اتاپ ءوتتى. وسىعان بايلانىستى نۇرسۇلتان نازاربايەۆ ەلىمىزدە جاستارعا ءبىلىم بەرۋ مەن قولداۋ كورسەتۋدە، سونىمەن بىرگە «سەرپىن-2050» مەملەكەتتىك باعدارلاماسى اياسىندا تۇراقتى نازار اۋدارىلىپ كەلە جاتقاندىعىنا توقتالىپ ءوتتى.

500 ورىندىق پاتەر تيپتەس جاتاقحانا 2015 -جىلى اشىلعان بولاتىن. مۇندا «سەرپىن-2050» باعدارلاماسى بويىنشا وقيتىن 300 ستۋدەنت تۇرادى. عيماراتتا مەديتسينالىق كابينەت، جاتتىعۋ زالى، جەكە مۇلىك ساقتايتىن كامەرا جانە تەحنيكالىق ورىن بار.

سونداي-اق مۇمكىندىگى شەكتەۋلى ستۋدەنتتەر ءۇشىن ارنايى بولمەلەر جابدىقتالعان.