استانا حالقى 2035-جىلى قانشا ميلليوننان اسادى

استانا. قازاقپارات - بۇگىن ەلوردالىق ءماسليحات جانىنداعى قوعامدىق كەڭەس وتىرىسىندا «استانا قالاسىنىڭ 2035-جىلعا دەيىنگى باس جوسپارىنىڭ» جاڭا جوباسى قارالدى، دەپ حابارلايدى قازاقپارات ءتىلشىسى.

«ءبىز 2035-جىلعا دەيىن قالانىڭ باس جوسپارىن ازىرلەۋشى ءارى ديزاينەرىمىز. كۇن ءتارتىبىنىڭ ءبىرىنشى كەزەڭى - جوبانى ازىرلەۋ بارىسى جانە ودان ءارى دامىتۋ. الدىمەن قوعامدىق كەڭەستە تالقىلاپ، ودان ءارى ساراپشىلارمەن پىسىقتايمىز»، - دەدى «استانا باس جوسپارى» مەكەمەسىنىڭ ديرەكتورى رۋسلان جاقىپوۆ استانا قوعامدىق كەڭەس وتىرىسى بارىسىندا.

ونىڭ ايتۋىنشا، قالانىڭ اۋماعى وزگەرىسسىز قالادى.

«ەسەپ بويىنشا 2035-جىلعا قاراي حالىق سانى 2,275 ميلليونعا جەتەدى. جوسپارلانعان تۇرعىن ءۇي كولەمى - شامامەن 68 ميلليون شارشى مەتر. نەگىزگى اۋداندىق باعىتتار - تۇران داڭعىلىنىڭ باتىسىنداعى «مىڭجىلدىق» اۋدانى، سونداي-اق كەرەي-جانىبەك حاندار كوشەسىنىڭ بويىنداعى «سوفيكو» اۋدانى. قالا قۇرىلىسىنىڭ نەگىزگى ماسەلەلەرى دە قاراستىرىلىپ جاتىر. ول - كولىك جۇيەسى، مەكتەپتەرمەن، بالاباقشالارمەن، اۋرۋحانالار، ءورت ءسوندىرۋ دەپولارى سەكىلدى الەۋمەتتىك ماسەلەلەر. قالا قۇرىلىسى قۇجاتتارىندا كەشەندى ماسەلەلەر رەتتەلەدى. قالانىڭ باس جوسپارىن ساراپتامادان وتكىزىپ، ۇكىمەتتىڭ قاۋلىسىمەن بەكىتۋگە ۇسىنامىز. سودان كەيىن ءاربىر اۋداندى ەگجەي-تەگجەيلى پىسىقتايمىز. قازىر ءبىز جوسپاردى حالىققا جەتكىزىپ جاتىرمىز»، - دەيدى ول.