2030-جىلعا قاراي دەنساۋلىق ساقتاۋ ماماندارىنا تاپشىلىق ارتادى
استانا. KAZINFORM - قازاقستان دەنساۋلىق ساقتاۋ مەنەدجەرلەرى قاۋىمداستىعى كەڭەسىنىڭ ءتوراعاسى قۋانىش ەرعاليەۆ دەنساۋلىق ساقتاۋ سالاسىنداعى بولجامداردى باياندادى. ايتا كەتەيىك، ەلوردادا دەنساۋلىق ساقتاۋ مەنەدجەرلەرىن دايىنداۋ ماسەلەلەرى تۋرالى دوڭگەلەك ۇستەل ءوتتى.
«قازىر دەنساۋلىق ساقتاۋ سالاسىندا حالىق سانىنىڭ ءوسۋى، جاڭا مەديتسينالىق تەحنولوگيالاردىڭ پايدا بولۋى سياقتى ءتۇرلى كۇردەلى سىناقتارعا تاپ بولىپ وتىرمىز. بۇل قيىندىقتاردى جەڭۋ ءۇشىن بىزگە كۇردەلى جۇيەلەردى باسقارۋعا جانە دۇرىس شەشىمدەر قابىلداۋعا قابىلەتتى، جوعارى بىلىكتى مەنەدجەرلەر مەن باسقارۋشىلار قاجەت. جوعارى وقۋ ورىندارى، كاسىبي قاۋىمداستىقتار جانە مەديتسينالىق ۇيىمداردىڭ باسشىلارى اراسىندا مەنەدجەرلەردى دايارلاۋدىڭ ۇزدىكسىز پروتسەسى ماسەلەلەرى ءبىز ءۇشىن دە ماڭىزدى»، - دەدى دەنساۋلىق ساقتاۋ ءمينيسترى اقمارال ءالنازاروۆا.
قۋانىش ەرعاليەۆتىڭ ايتۋىنشا، دەنساۋلىق ساقتاۋ جۇيەسىندەگى نەگىزگى جاھاندىق سىن-قاتەر - مەديتسينا قىزمەتكەرلەرىنىڭ تاپشىلىعى بولادى.
«2030-جىلعا قاراي دەنساۋلىق ساقتاۋ جۇيەسىندە 10 ميلليونعا جۋىق ادام جەتىسپەيدى دەپ بولجانۋدا. بۇل دەرەك دۇنيەجۇزىلىك ەكونوميكالىق فورۋمدا ايتىلدى. ەكىنشى سىن-قاتەر - قارجىلىق جۇكتەمە. جاھاندىق دەڭگەيدە بارلىق ەلدەر بويىنشا قارجىلاندىرۋ ارتقانىن كورىپ وتىرمىز، ءبىراق دەنساۋلىق ساقتاۋ جۇيەسى ۇلگەرمەيدى، دەنساۋلىق كورسەتكىشتەرى دە جاقسارعان جوق. قازاقستاندا الەۋمەتتىك مەديتسينالىق ساقتاندىرۋدى ەنگىزۋ ارقىلى قارجىلاندىرۋ 3 ەسە ءوستى، ءبىراق دەنساۋلىق كورسەتكىشتەرى ەش ديناميكانى كورسەتپەدى»، - دەدى ق. ەرعاليەۆ.
سونىمەن بىرگە، سپيكەر مەديتسينالىق قىزمەتتەرگە قول جەتكىزۋدەگى تەڭسىزدىكتىڭ ارتقانىن دا اتاپ ءوتتى.
«اسىرەسە مۇنى پاندەميادان كەيىن كوردىك. دەنساۋلىق ساقتاۋ جۇيەسىندە تەڭسىزدىك ماسەلەلەرى شيەلەنىسە ءتۇستى. مەديتسينالىق قىزمەتتەرگە قول جەتكىزە المايتىن ادامدار سانى ارتتى، حالىقتىڭ كەدەي جانە مارگينالدى توپتارى زارداپ شەگەدى»، - دەدى ول.
جۇقپالى ەمەس اۋرۋلار دەنساۋلىق ساقتاۋ جۇيەسىندە دە ۇلكەن اۋىرتپالىق تۋدىرۋدا.
«جۇقپالى ەمەس سوزىلمالى اۋرۋلاردان بولاتىن ءولىم-ءجىتىم ۇلەسى الداعى ۋاقىتتا تەك قانا وسەدى. قازىر ءولىم-ءجىتىم شامامەن %74 قۇراسا، 2030-جىلعا قاراي جاھاندىق ءولىم-ءجىتىم 80 پايىزدان اسادى، اسىرەسە دامۋشى ەلدەردە كوبىرەك بايقالادى. ءبىراق جۇقپالى اۋرۋلار دا نازارىمىزدان تۇسپەۋى كەرەك. بۇعان COVID-19 دالەل»، - دەيدى قۋانىش ەلىكبايەۆ.
