2030-جىلعا قاراي اۆتوكولىك يەلەنۋ زاڭسىز بولاتىنى راس پا؟
قازنەتتە دۇنيەجۇزىلىك ەكونوميكالىق فورۋمنىڭ نەگىزىن قالاۋشى كلاۋس شۆابتىڭ سوزدەرى تالقىلانىپ جاتىر، - دەپ حابارلايدى stopfake.kz.

ونىڭ سوزىنشە، اۆتوكولىكتەرگە يەلىك ەتۋ ءداۋىرى اياقتالىپ كەلەدى جانە 2030-جىلعا قاراي جەكە كولىك بولۋى زاڭسىز دەپ تانىلادى.
بۇل جاڭالىقتىڭ العاشقى دەرەككوزى - The People’s voice جاڭالىقتار پورتالى. بۇل پورتال ۇنەمى جالعان حابارلامالار، ۇگىت-ناسيحات جاريالايدى.
«كلاۋس شۆابتىڭ 2030-جىلعا قاراي اۆتوكولىككە يەلىك ەتۋ زاڭسىز سانالادى دەگەن مالىمدەمەسى وتىرىك. 2014-جىلى دۇنيەجۇزىلىك ۇكىمەتتىك سامميتتە كلاۋس شۆاب بولاشاقتا ادامدار جەكە كولىككە يەلىك ەتۋدىڭ ورنىنا اۆتوپيلوت ەلەكتروموبيلدەردى شاقىرۋ ءۇشىن قوسىمشالاردى قولدانادى دەگەن يدەيانى العا تارتتى. ءتۇپنۇسقا ۆيدەو ون جىل بۇرىن جازىلسا دا، ونىڭ ءسوزىنىڭ ناق وسى بولىگى بۇگىندە الەۋمەتتىك جەلىدە تاراپ جاتىر»، - دەلىنگەن باسىلىم مالىمەتىندە.
سونىمەن قاتار، دەف سايتىندا 2016-جىلى اۆتوموبيلدەر ءداۋىرى اياقتالعانى تۋرالى ماقالا بار، ءبىراق وندا زاڭسىز بولاتىنى ايتىلماعان. ماتەريالدا بولاشاقتا ءىرى قالالاردا اۆتوپيلوتپەن جابدىقتالعان ەلەكتروموبيلدەرى بار اۆتوپاركتەر پايدا بولعان كەزدەگى مۇمكىندىكتەر تۋرالى جازىلعان.
دەمەك، كلاۋس شۆاب تا، ونىڭ ارىپتەستەرى دە كولىككە يەلىك ەتۋ 2030-جىلعا قاراي زاڭسىز بولادى دەپ مالىمدەگەن جوق. ول بولاشاقتا اۆتوپيلوتى بار كولىكتى جالعا الۋ جەكە كولىك ساتىپ العاننان تيىمدىرەك جانە اقىلعا قونىمدى بولادى دەگەن ويىن ايتقان.