ۇكىمەت 2029 -جىلعا دەيىن وبلىستىق جانە اۋداندىق ماڭىزى بار 14 مىڭ شاقىرىم جولدى جوندەۋدى جوسپارلاپ وتىر
كولىك ءمينيسترى مارات قارابايەۆتىڭ بايانداۋىنشا، پرەزيدەنت 2029 -جىلعا دەيىن رەسپۋبليكالىق جەلىدەگى 8 مىڭ شاقىرىم جولدى ساپالى سالۋ جانە رەكونسترۋكسيالاۋ مىندەتىن قويعان.
ماسەلەن، تاياۋ جىلدارى جالپى ۇزىندىعى 4,7 مىڭ ك م نەگىزگى اۆتوجول جوبالارىن كەزەڭ- كەزەڭمەن ىسكە اسىرۋ جوسپارلانىپ وتىر.
بۇگىنگى تاڭدا ءبىرىنشى كەزەكتە 2 مىڭ شاقىرىمعا ارنالعان ءۇش جوبا تۇر. ولار بويىنشا وتە اۋقىمدى جۇمىس جۇرگىزىلگەن.
جالپى 2029 -جىلعا قاراي ۇلتتىق ستاندارتقا سايكەس كەلەتىن 300-دەن استام جاڭا قىزمەت كورسەتۋ نىسانىنىڭ قۇرىلىسى جۇرگىزىلمەك.
جالپى 2029 -جىلعا دەيىن وبلىستىق جانە اۋداندىق ماڭىزى بار 14 مىڭ شاقىرىم جولدى جوندەۋ جوسپارلانعان.
پرەمەر- مينيستر كولىك سالاسى ەلدىڭ ەكونوميكالىق دامۋىنىڭ لوكوموتيۆتەرىنىڭ بىرىنە اينالۋى ءتيىس ەكەنىن اتاپ ءوتتى.
بيىل تاۋلىگىنە 50 مىڭعا جۋىق اۆتوكولىكتى وتكىزۋگە مۇمكىندىك بەرەتىن «ۇلكەن الماتى اينالما اۆتوموبيل جولى» العاشقى كونسەسسيالىق جوباسى ىسكە اسىرىلدى.
بۇل رەتتە ۇكىمەت باسشىسى جولداردىڭ ساپاسى ءجيى سىنعا ۇشىراپ جاتاتىنىن اتاپ ءوتتى.
«تۇرعىنداردان تۇسەتىن شاعىمدار تۋرالى بىلەسىزدەر. قاراپايىم ادامعا ول رەسپۋبليكالىق دەڭگەيدەگى جول ما، الدە جەرگىلىكتى جول ما، ەشقانداي ايىرماشىلىعى جوق. وعان ءۇيدىڭ جانىندا، قالادا، اۋىلدا نەمەسە ەلدى مەكەندەر اراسىندا جاقسى جولدار قاجەت. بۇل بارىمىزگە، ءبىزدىڭ ەكونوميكامىزعا قاجەت»، - دەدى ءاليحان سمايىلوۆ.
ۇكىمەت باسشىسى قۇرىلىس ماۋسىمى اياقتالۋعا جاقىن ەكەنىن، سوندىقتان قىركۇيەك ايىندا جول- قۇرىلىس جۇمىستارىن ايتارلىقتاي جانداندىرۋ قاجەتتىگىن اتاپ ءوتتى.
بۇل رەتتە پرەمەر- مينيستر كوكتەمدە «اسفالت قارمەن بىرگە شايىلىپ كەتپەس ءۇشىن» جولداردىڭ ءتيىستى ساپاسىن قامتاماسىز ەتۋدى تالاپ ەتتى.
تاعى ءبىر ماڭىزدى ماسەلە - اۆتوموبيل جولدارىمەن اۋىر جۇك ماشينالارىنىڭ ءجۇرۋى.
«ءبىر جولدى جوندەۋ جانە سالۋ كەزىندە جۇك كولىكتەرى باسقا جولداردى، سونىڭ ىشىندە جاڭادان جوندەلگەن جولداردى بۇلدىرەتىن جاعدايلار ءجيى كەزدەسەدى. مىسالى، قاراعاندى وبلىسىنداعى نارمانبەت - بالقاش اۆتوجولىندا جاڭادان جوندەلگەن جول بويىنشا شۇبارتاۋ كارەرىنەن كەن تاسىمالدانا باستاعان. كەن تيەلگەن جۇك كولىگىنىڭ سالماعى 60 توننا! ناتيجەسىندە جاڭا اسفالت ءبۇلىندى. مۇنداي مىسالدار كوپ، ءتىپتى قالالاردا دا كەزدەسەدى»، - دەدى ءاليحان سمايىلوۆ.
پرەمەر- مينيستر جولداردى جوبالاۋ جانە سالۋ، سونداي- اق ولاردى كۇتىپ- ۇستاۋ ماسەلەلەرىن كەشەندى تۇردە شەشۋ قاجەتتىگىن اتاپ ءوتتى. ول ءۇشىن مەملەكەت باسشىسىنىڭ تاپسىرماسى بويىنشا كولىك مينيسترلىگى ارنايى قايتا قۇرىلىپ وتىر.
