2028-جىلعى وليمپياداعا دايىندىق: قازاقستان سپورتشىلارى ح و ك ستيپەندياسىنا يە بولدى

استانا. قازاقپارات - 2028-جىلى لوس-اندجەلەستە (ا ق ش) وتەتىن وليمپيادا ويىندارىنا دايىندالۋ ماقساتىندا حالىقارالىق وليمپيادا كوميتەتىنىڭ (ح و ك) جەكەلەي ستيپەندياسىن العان قازاقستاندىق سپورتشىلاردىڭ ەسىمى بەلگىلى بولدى.

بۇل باستامانى قازاقستان ۇلتتىق وليمپيادالىق كوميتەتى كوتەرىپ، ۇلتتىق فەدەراتسيالارمەن جانە ح و ك- مەن بىرلەسە جۇمىس جۇرگىزدى. سونداي-اق بارلىق قاجەتتى قۇجاتتى راسىمدەۋدى قامتاماسىز ەتتى.

باعدارلامانىڭ ماقساتى - سپورتشىلاردى ءتورتجىلدىقتىڭ باستى دوداسىنا ىرىكتەۋ كەزەڭىندە جانە دايىندىق بارىسىندا قولداۋ.

ق ر ۇ و ك مالىمەتىنشە، ۇسىنىلعان كانديداتتار ۇلتتىق فەدەراتسيالار ارقىلى ىرىكتەلىپ، گەندەرلىك تەڭدىك ساقتالدى. ءار سپورت تۇرىنەن ءبىر ەر جانە ءبىر ايەل سپورتشى ۇسىنىلدى. سونىمەن قاتار مۇمكىندىگىنشە كوبىرەك سپورت ءتۇرىن قامتۋعا ءمان بەرىلدى، وسىلايشا ءارتۇرلى باعىتتاعى اتلەتتەرگە قولداۋ كورسەتىلدى.

ستيپەنديا لوس-اندجەلەس وليمپياداسىنىڭ باعدارلاماسىنا ەنگەن جەكەلەي سپورت تۇرلەرىندە ونەر كورسەتەتىن سپورتشىلارعا بەرىلەدى.

مىندەتتى تالاپتار: ىرىكتەۋدەن وتۋگە جانە جوعارى ورىندارعا ۇمىتكەر بولۋعا مۇمكىندىك بەرەتىن ناتيجەلەر، سونداي-اق دوپينگكە قارسى ەرەجەلەردى بۇزباۋ جانە وليمپيادالىق حارتياعا قايشى كەلەتىن سانكسيالاردىڭ بولماۋى.

قارجى وقۋ-جاتتىعۋ جيىندارىنا، جەكەلەي دايىندىقتارعا، باپكەرلەر مەن مامانداردىڭ ەڭبەكاقىسىن تولەۋگە، مەديتسينالىق جانە عىلىمي قولداۋعا، ساقتاندىرۋعا، سونداي-اق تۇرۋ مەن تاماقتانۋعا جۇمسالادى. قاراجاتتىڭ ماقساتتى جۇمسالۋى تۇراقتى ەسەپپەن قاداعالانادى.

قازاقستاننان باعدارلاماعا ەنگەن سپورتشىلار ءتىزىمى:

- ايدا ابىكەيەۆا (بوكس)

- ساعىندىق توعامباي (بوكس)

- عۇسمان قىرعىزبايەۆ (دزيۋدو)

- ءابيبا ءابۋجاقىنوۆا (دزيۋدو)

- ميلاد كاريمي (سپورتتىق گيمناستيكا)

- رۋسلان كۋربانوۆ (سەمسەرلەسۋ)

- يسحار كۋربايەۆ (گرەك-ريم كۇرەسى)

- ريزابەك ايتمۇحان (ەركىن كۇرەس)

- زەينەپ بايانوۆا (ايەلدەر كۇرەسى)

- ماريا بروۆكوۆا (بايداركا مەن كانوەدە ەسۋ)

- الەكساندرا لە (نىسانا كوزدەۋ، پنيەۆماتيكالىق قارۋ)

- يسلام ساتپايەۆ (نىسانا كوزدەۋ، پنيەۆماتيكالىق قارۋ)

- ءامىر مايمۇراتوۆ (سپورتتىق قۇزعا ورمەلەۋ)

- باتىرحان تولەۋعالي (تاەكۆوندو)

- الان قۇرمانعاليەۆ (ۇستەل تەننيسى)

- ەليزاۆەتا ماتۆەيەۆا (جەڭىل اتلەتيكا)

- اسەم ورىنباي (ستەند اتۋ)

- سەرگەي پەتروۆيچ (اۋىر اتلەتيكا)

- اراي نۇرلىبەكوۆا (اۋىر اتلەتيكا)

- دانيل مۋسابايەۆ (باتۋتتاعى گيمناستيكا).

قازاقستاندىق سپورتشىلاردىڭ بۇل باعدارلاماعا ەنۋى ولاردىڭ وليمپيادا-2028 ويىندارىنا جۇيەلى ءارى ساپالى دايىندىق جۇرگىزۋىنە قوسىمشا مۇمكىندىك بەرەدى.

ايتا كەتەيىك، لوس-اندجەلەس - 2028 وليمپياداسىنىڭ تولىق كەستەسى جاريالاندى.