2028-جىلعا قاراي قازاقستاندا مالدىڭ 90 پايىزى تاڭبالانادى
استانا. قازاقپارات - 2028-جىلعا قاراي اۋىل شارۋاشىلىعى جەرلەرىنىڭ كەمىندە 50 پايىزى سيفرلىق باقىلاۋعا الىنادى. بۇل تۋرالى پرەمەر-ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ مالىمدەدى.
- اگروونەركاسىپتىك كەشەندە سيفرلاندىرۋ ورنىقتى دامۋ ماقساتتارى 2 ءنى ىسكە اسىرۋدىڭ ماڭىزدى تەتىگىنە اينالدى. فەرمەرلەرگە سۋبسيديا مەن مەملەكەتتىك قولداۋ الۋ بويىنشا كەڭەس بەرەتىن جاساندى ينتەللەكت كومەكشىسى ەنگىزىلىپ جاتىر، - دەدى جاسلان ماديەۆ سەناتتا ورنىقتى دامۋى سالاسىنداعى ۇلتتىق ماقساتتاردىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيانىڭ XI وتىرىسىندا.
سونىمەن قاتار «ەلەكتروندىق اگروونەركاسىپ كەشەنى (ە- ا و ك)» ەكوجۇيەسى قۇرىلىپ جاتىر، ول Smart Farming تەحنولوگياسىنا نەگىزدەلگەن.
- 2028-جىلعا قاراي اۋىل شارۋاشىلىعى جەرلەرىنىڭ كەمىندە 50 پايىزى سيفرلىق باقىلاۋعا الىنادى دەپ جوسپارلانعان. بۇل ەگىن ونىمدىلىگىن 20-25 پايىزعا ارتتىرىپ، قۇرعاقشىلىق پەن زيانكەستەردەن بولاتىن شىعىنداردى ازايتادى.
سونىمەن قاتار، مال باسىنىڭ 90 پايىزى RFID- بەلگىلەر مەن جاساندى ينتەللەكت ارقىلى تاڭبالانادى. بۇل شارالار ەلدىڭ ازىق-تۇلىك قاۋىپسىزدىگىن نىعايتادى، - دەدى مينيستر.
وسى ورايدا ول اگروونەركاسىپ كەشەنىن سيفرلاندىرۋ سالانى جاڭعىرتۋعا، اۋىل شارۋاشىلىعىن تۇراقتى دامىتۋ جونىندەگى جاھاندىق ماقساتتارعا ەلەۋلى ۇلەس قوساتىنىن اتاپ ءوتتى.
بۇدان بۇرىن حابارلانعانداي، بۇگىن پارلامەنت سەناتىندا قازاقستاننىڭ ورنىقتى دامۋى سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيانىڭ IX وتىرىسى ءوتتى.
