قازاقستاندا 2026 -جىلعا قاراي جىلىنا جارتى ميلليون ماشينا شىعارۋى كەرەك - مينيستر
ۆەدومستۆو باسشىسى وتكەن جىلى ەلدە 100 مىڭنان استام جەڭىل اۆتوكولىك جينالعانىن ايتتى، دەپ حابارلايدى قازاقپارات ءتىلشىسى.
«جالپى، اۆتوموبيل جاساۋ - ەلىمىزدەگى جاڭا باعىت. ءبىز بۇل سالادا شامامەن 10 جىل بۇرىن جۇمىس ىستەي باستادىق. وتكەن جىلى اۆتوموبيل ءوندىرىسى 100 مىڭنان استام جەڭىل ماشينانى كورسەتتى. بۇعان دەيىن اۆتوموبيل قۇراستىرۋعا باسا ءمان بەرىلەتىن. ەندى ءبىز لوكاليزاتسيانى تەرەڭدەتە تۇسەمىز، تالاپتاردى قاتايتامىز. ءار برەندتەن ءبىر مودەلدى ۇساق قۇراستىرۋ ارقىلى جيناۋ كەرەك. شاعىن قۇراستىرۋ - 2 مىڭنان استام وپەراتسيانى قۇرايدى، بۇل وراسان زور جۇمىس. وعان قوسا، جاڭا جوبالار دا بار. ءبىز شينالار ءوندىرىسىن باستادىق، اككۋمۋلياتورلار مەن الدىڭعى بامپەرلەر شىعارا باستادىق. ءارى قارايعى مىندەت - جەرگىلىكتى ءوندىرىستى دامىتۋ»، - دەدى مينيستر استانادا Ondeu Expo يندۋستريالىق كورمەسىندە تىلشىلەرگە بەرگەن سۇحباتىندا.
سونداي-اق، يندۋستريا ءمينيسترى ەلىمىزدە اۆتو ءوندىرۋ كولەمى ارتىپ كەلە جاتقانىن ايتتى.
«ەگەر قازاقستان نارىعى - 150 مىڭ ماشينا بولسا، كەلەسى جىلى قازاقستاندىق اۆتو ءوندىرىس 150 مىڭ ماشينانى شىعارادى. ياعني، نارىقتىڭ جاڭا اۆتوكولىكتەرگە دەگەن قاجەتتىلىگى تولىعىمەن جابىلادى. ءبىرقاتار جاڭا جوبالار بار. ءبىزدىڭ مىندەتىمىز - 2026 -جىلعا قاراي قازاقستان جىلىنا جارتى ميلليون ماشينا شىعارۋى ءۇشىن ءوندىرىس كولەمىن 500 مىڭعا دەيىن ارتتىرۋ»، - دەپ تولىقتىردى مارات قارابايەۆ.
ايتا كەتەيىك، ەلوردادا «EXPO» حالىقارالىق كورمە ورتالىعىندا Ondeu EXPO وڭدەۋ ونەركاسىبىنىڭ حالىقارالىق كورمەسى جانە Kazakhstan Machinery Fair ماشينا جاساۋ جانە مەتالل وڭدەۋ بويىنشا حالىقارالىق مامانداندىرىلعان كورمەسى ءوتىپ جاتىر.
