2026-جىلعى وليمپيادا ويىندارىن ۇيىمداستىرۋ كوميتەتى مالىمدەمە جاسادى
استانا. KAZINFORM - حالىقارالىق وليمپيادالىق كوميتەتى (ح و ك) مەن 2026-جىلعى قىسقى وليمپيادا جانە پاراليمپيادا ويىندارىن ۇيىمداستىرۋ كوميتەتىنىڭ بىرلەسكەن سەمينارى ءوتتى.
قازاقستان ۇلتتىق وليمپيادالىق كوميتەتى اتىنان ءىس-شاراعا سپورت دەپارتامەنتىنىڭ باسشىسى بەكتۇر قياتباي مەن حالىقارالىق قاتىناستار دەپارتامەنتىنىڭ ديرەكتورى انار سىزدىقوۆا قاتىستى.
سەمينار بارىسىندا 78 ۇ و ك پەن 33 ۇلتتىق پاراليمپيادالىق كوميتەتىنىڭ وكىلدەرى وليمپيادا ويىندارىنا دايىندىق تۋرالى تولىق اقپارات الدى. اتاپ ايتقاندا، وليمپيادا قالاشىعى مەن قوناق ۇيلەردىڭ جاعدايى، سپورتتىق نىسانداردىڭ دايىندىعى، لوگيستيكا، الەۋمەتتىك جەلىلەردى جۇرگىزۋ ەرەجەلەرى جانە قاۋىپسىزدىك شارالارى تالقىلاندى.
2026-جىلعى قىسقى وليمپيادا ويىندارى 6-22-اقپان ارالىعىندا وتەدى دەپ جوسپارلانىپ وتىر. وعان كەمىندە 3500 سپورتشى قاتىسىپ، 195 مەدال جيىنتىعى ساراپقا سالىنادى. بۇل وليمپيادا اعدارلاماسىنا العاش رەت سكي-الپينيزم سپورتى ەنگىزىلدى.
2026-جىلعى وليمپيادا يتاليا تاريحىنداعى ءتورتىنشى بولماق. بۇعان دەيىن 1956-جىلى كورتينا- د’امپەتستسودا، 2006-جىلى تۋريندە قىسقى، ال 1960-جىلى ريمدە جازعى وليمپيادا ويىندارىن وتكىزگەن.
ميلان جارىستاردىڭ باستى ورتالىعى بولادى. مۇندا كونكيمەن جۇگىرۋ، شورت-ترەك، مانەرلەپ سىرعاناۋ جانە شايبالى حوككەي بويىنشا جۇلدەلەر ساراپقا سالىنادى.
- رەسمي اقپاراتقا سايكەس، ميلاندا وليمپيادا قالاشىعىنىڭ قۇرىلىسى اياقتالۋعا جاقىن. ويىنداردان كەيىن ول ستۋدەنتتەرگە ارنالعان تۇرعىن ءۇي كەشەنى رەتىندە پايدالانۋعا بەرىلمەك. سونىمەن قاتار ءداستۇرلى سپورتشىلار قالاشىعى كورتينودا جانە پرەداتستسودا ورنالاسادى. قالعان جارىس ايماقتارىندا سپورتشىلار الەمدىك چەمپيوناتتار مەن كۋبوكتاردى قابىلداۋ تاجىريبەسى بار قوناق ۇيلەردە تۇرادى. دەلەگاتسيالار ءۇشىن بارلىق قاجەتتى جاعداي جاسالادى. ۇيىمداستىرۋ كوميتەتىنىڭ مالىمەتىنشە، دايىندىق كەستەگە ساي جۇرگىزىلىپ جاتىر جانە ايتارلىقتاي كەشىگۋ جوق، - دەپ مالىمدەدى بەكتۇر قياتباي.
وليمپيادا ويىندارىنىڭ جارىس ايماقتارى:
كورتينا كلاستەرى:
انتەرسەلۆا - بياتلون
كورتينا - تاۋ شاڭعىسى (ايەلدەر)، شانا سپورتى، بوبسلەي، سكەلەتون، كەرلينگ
ۆالتەللينا كلاستەرى:
بورميو - تاۋ شاڭعىسى (ەرلەر)، سكي-الپينيزم
ليۆينو - سنوۋبورد، فريستايل (اكروباتيكا، موگۋل، بيگ-ەير، حالف-پايپ، سكي-كروسس)
ۆال-دي-فەممە كلاستەرى:
پرەداتستسو - شاڭعى جارىسى، شاڭعىمەن ترامپليننەن سەكىرۋ، قوسسايىس
وليمپيادا تاريحىندا العاش رەت اشىلۋ سالتاناتى ءتورت جارىس ايماعىندا ءبىر مەزەتتە وتكىزىلەدى. وليمپيادا الاۋى ميلان مەن كورتينودا ءبىر ۋاقىتتا جاعىلىپ، باستى ساحنا رەتىندە ميلانداعى ايگىلى «سان-سيرو» ستاديونى تاڭدالىپ وتىر.
وليمپيادانىڭ جابىلۋ ءراسىمى ۆەرونادا وتەدى.
بۇعان دەيىن بوكس 2028-جىلعى وليمپيادا ويىندارىنىڭ باعدارلاماسىنا ەنگىزىلگەنىن جازعان بولاتىنبىز.
