جۇمىسشى جاستارعا باسپانانى جالعا بەرۋ 2025 -جىلعا دەيىن ۇزارتىلادى
بۇل تۋرالى ق ر اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتىنىڭ ءتوراعاسى شاحماردان بايمانوۆ ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، جۋىقتا عانا Government for zhastar عىلىمي- زەرتتەۋ ورتالىعىنىڭ جانىنان جاستاردىڭ ماسەلەلەرىمەن اينالىساتىن الاڭ قۇرىلعان. وسى الاڭدا قازاقستاندىق جاستاردىڭ باسپانا ماسەلەسىن تالقىلاۋعا ارنالعان شارا جوسپارلانىپ وتىر.
«نۇر- سۇلتان، الماتى، شىمكەنت قالالارىندا جۇمىس ىستەپ جۇرگەن جاستارعا ارەندالىق باسپانا بەرىلەتىنىن بىلەسىزدەر. بۇل باعدارلاما 2021 -جىلعا دەيىن جوسپارلانعان. اتالعان وڭىرلەردە بۇل باعدارلامانى 2025 -جىلعا دەيىن ۇزارتۋ تۋرالى شەشىم قابىلداندى»، - دەدى ول پرەزيدەنت جولداۋىن تالقىلاۋعا ارنالعان اناليتيكالىق ديسكۋرس بارىسىندا.
ونىڭ سوزىنە قاراعاندا، وزگە وڭىرلەردە دە وسىعان ۇقساس باعدارلامانى ىسكە قوسۋ جوسپارلانىپ وتىر.
«2022 -جىلدان باستاپ وزگە وڭىرلەردە دە وسىعان ۇقساس باعدارلامالار ىسكە قوسىلادى. قازىردىڭ وزىندە 3-4 ءوڭىر نيەت ءبىلدىرىپ وتىر»، - دەدى شاحماردان بايمانوۆ.
