قازاقستاندا حالىقتىڭ ءومىر ءسۇرۋ ۇزاقتىعى 2025 -جىلعا قاراي 75 جاسقا جەتەدى
نۇر-سۇلتان. قازاقپارات - 2025 -جىلعا قاراي قازاقستاندا حالىقتىڭ ءومىر ءسۇرۋ ۇزاقتىعى 75 جاسقا جەتەدى.
بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
«باعدارلامانى جۇزەگە اسىرۋعا 3 تريلليون 180 ميلليارد تەڭگە ءبولۋ قاراستىرىلعان. ەلباسى تاپسىرماسىن ورىنداۋ بارىسىندا دەنساۋلىق ساقتاۋ شىعىندارىنىڭ ۇلەسى جالپى ىشكى ءونىمنىڭ 5 پايىزىنا جەتكىزىلەدى. ول ءۇشىن التى جىلدا دەنساۋلىق سالاسىنا بارلىق كوزدەردەن جالپى 25,8 تريلليون تەڭگە جۇمسالادى»، - دەدى 2020-2025 -جىلدارعا ارنالعان دەنساۋلىق ساقتاۋدى دامىتۋ مەملەكەتتىك باعدارلاماسىنىڭ جوباسىن تانىستىرعان مينيستر.
ونىڭ اتاپ وتۋىنشە، دەنساۋلىق سالاسىنداعى جالپى شىعىندار ىشىندە ينۆەستيتسيالار كولەمى 2,8 تريلليون تەڭگەنى قۇرايدى. جەكە ينۆەستيتسيالار ۇلەسى ورتاشا 70 پايىزعا وسەدى. ينۆەستيتسيالاردىڭ 43 پايىزى ءىرى مەملەكەتتىك- جەكەشەلىك ارىپتەستىك جوبالارعا جۇمسالادى.
«باعدارلامانى ورىنداۋ ارقىلى ءبىر ادامنىڭ دەنساۋلىعىنا شاققاندا شىعىندار 279 مىڭ تەڭگەگە جەتەدى. دەنساۋلىق ساقتاۋ ينفراقۇرىلىمى جاڭارادى، جانە كەلەسى ءتورت ماقساتتى ينديكاتورعا قول جەتكىزىلەدى. نەگىزگى سوزىلمالى اۋرۋلاردان ەرتە ءولىم قاۋپى 20 پايىزعا، انا ءولىمى 17 پايىزعا، نارەستە ءولىمى 19 پايىزعا تومەندەيدى. حالىقتىڭ ءومىر ءسۇرۋ ۇزاقتىعى 75 جاسقا جەتەدى. باعدارلاما جوباسى حالىقپەن، مەملەكەتتىك ەمەس جانە حالىقارالىق ۇيىمدارمەن، بارلىق مەملەكەتتىك ورگاندارمەن، پرەزيدەنت اكىمشىلىگىمەن كەلىسىلگەن»، - دەدى ەلجان ءبىرتانوۆ.
اۆتور: مارلان جيەمباي
