ەۋرو-2024: شوتلانديا يسپانيانى 38 جىلدان كەيىن جەڭدى

استانا. قازاقپارات - فۋتبولدان 2024 -جىلعى ەۋروپا چەمپيوناتىنا ىرىكتەۋ ساتىسىنىڭ 2-تۋرى مارەسىنە جەتتى، دەپ حابارلايدى قازاقپارات ءتىلشىسى.

بۇل كۇنى A، D، I توپتارىندا ەكىنشى تۋر ويىندارى ءوتتى.

نەگىزگى ويىننىڭ ءبىرى ا توبىندا شوتلانديا مەن يسپانيا اراسىندا بولعان ەدى.

العاشقى تۋردا يسپانيا ءوز الاڭىندا نورۆەگيانى، شوتلانديا كيپردى 3:0 ەسەبىمەن تاس-تالقان ەتىپ جەڭگەن بولاتىن. يسپانيالىق فۋتبولشىلار بۇل جولى قارسىلاسىنا قاۋقار كورسەتە المادى. ناتيجەسىندە 0:2 ەسەبىنە جول بەرىپ، جەڭىلىستىڭ اشى ءدامىن تاتتى.

ايتا كەتەرلىگى، بۇدان بۇرىن شوتلانديا اتالعان قارسىلاسىنان 1984 -جىلدىڭ 14-قاراشاسىندا باسىم تۇسكەن-دى. ەندى 38 جىلدان كەيىن سول جەتىستىگىن قايتالاپ وتىر.

وسىلايشا ەكى تۋردا التى ۇپاي ولجالاعان شوتلانديا ءوز توبىندا كوش باسىنا شىقتى.

سونداي-اق، اتالعان توپتا گرۋزيا - نورۆەگيا 1:1 ەسەبىمەن تەڭ ءتۇستى.

ال D توبىندا ۋەلس پەن لاتۆيا 1:1 ەسەبىنە قاناعات بىلدىرسە، تۇركيا ءوز الاڭىندا حورۆاتياعا 0:2 ەسەبىمەن جەڭىلدى.

ال I توبىندا كوسوۆو - اندوررا 1:1 ەسەبىمەن تەڭ ويناسا، شۆەيتساريا يزرايلدى 3:0، رۋمىنيا بەلارۋستى 2:1 ەسەبىمەن تىزە بۇكتىردى.

ەندى ءۇشىنشى تۋر ويىندارى 16-17، 19-20-ماۋسىم كۇندەرى وتكىزىلەدى.

ەسكە سالساق، 26-ناۋرىزدا H توبىندا قازاقستان قۇراماسى دانيانى 3:2 ەسەبىمەن ۇتتى.