قۇربان ايت - 2023: قۇرباندىققا شالىناتىن مالعا قاتىستى نە ءبىلۋ كەرەك؟
قۇربان ايتقا قاتىستى ءتۇرلى سۇراق بار. ونىڭ ىشىندە، قۇرباندىق رەتىندە سويىلاتىن مالعا قاتىستى ساۋالدار كوپ. Massaget.kz ءتىلشىسى ق م د ب دەرەكتەرىنە سۇيەنىپ، ماڭىزدى سۇراقتاردىڭ جاۋابىنا شولۋ جاسادى.
جولاۋشىعا قۇربان شالۋ مىندەتتى مە؟
قمدب مالىمەتىنشە، 90 شاقىرىمنان استام جەرگە ساپارعا شىققان ادامعا قۇرباندىق شالۋى مىندەتتى ەمەس. الايدا جولاۋشى ايت كۇندەرىنىڭ دەمالىسىن پايدالانىپ نەمەسە باسقا دا سەبەپتەرگە بايلانىستى ساپارلاپ بارعان جەرىندە قۇربان شالۋىنا رۇقسات ەتىلەدى. ونىڭ ساپارعا شىققانى قۇربان شالۋىنا جانە قۇلشىلىعىنىڭ قابىل بولۋىنا كەدەرگى بولمايدى.
جولاۋشى ساپاردا ءجۇرىپ قۇربان شالىپ، ايت كۇندەرى بىتپەي جاتىپ ۇيىنە قايتسا، وعان ەكىنشى رەت قۇربان شالۋ مىندەتتى ەمەس. سونداي-اق ايت كۇندەرىنىڭ باسىندا تۇرعىلىقتى بولىپ، كەيىن ايت كۇندەرىنىڭ ىشىندە ساپارعا شىقسا دا وعان قۇربان شالۋ مىندەتتەلمەيدى. ال ەگەر ايتتىڭ ءبىرىنشى كۇنى ساپاردا بولىپ قۇربان شالماسا، كەيىن ايت كۇندەرى ۇيىنە قايتسا، وعان قۇربان شالۋ ءتيىس بولادى.
بۋاز مالدى سويۋعا بولا ما؟
بۋاز مالدى سويۋعا رۇقسات. الايدا تولدەۋىنە جاقىن قالعان بۋاز مالدى سويۋ - ماكرۋھ (ءدىني تەرمينگە سالساق، ءدىن تۇرعىسىنان ۇنامسىز، جامان ءىس- ارەكەت- ەسك. ). شاريعات قوعامنىڭ نەمەسە جەكە تۇلعانىڭ قاجەتتىلىگى بولماسا، سەبەپسىز ءۇي جانۋارلارىن سويۋعا، جابايى اڭداردى اۋلاۋ مەن اتۋعا، اعاشتاردى ورىنسىز كەسۋگە رۇقسات ەتپەيدى.
قۇرباندىق شالعاندا قالاي نيەت ەتۋ كەرەك؟
نيەت ەتۋ - وتە ماڭىزدى. نيەتسىز ءىس بىتپەيدى. ناقتى نيەت ەتپەسە، كوزدەلگەن ماقسات ورىندالماي، جاي ءبىر ارەكەت بولىپ قالادى.
قۇرباندىق دۇرىس بولۋ ءۇشىن ءۇش شارت تابىلۋ قاجەت: ساۋ مال بولۋ، ايت كۇندەرى قۇرباندىق شالۋ جانە نيەت ەتۋ. نيەتتى تىلمەن ايتۋ شارت ەمەس، كوڭىلدە نيەت ەتۋدىڭ ءوزى جەتكىلىكتى. قۇرباندىق مالىن ساتىپ العاندا، بىرەۋگە تاپسىرىس بەرگەندە نەمەسە ونى ءوزى باۋىزداعان كەزدە قۇرباندىق عيباداتىن نيەت ەتۋمەن شارت ورىندالادى.
وسى ورايدا، قۇرباندىق عيباداتىندا نيەتتىڭ ماڭىزدىلىعىن كورسەتەتىن مىنا مىسالدارعا توقتالىپ وتسەك:
قاساپشى قۇربان شالىپ جاتقانىن ۇمىتىپ مالدى باۋىزداسا، بۇل جاعدايدا مالدى ساتىپ الىپ جاتقانداعى نەمەسە مالدى قۇرباندىققا بەلگىلەپ جاتقانداعى نيەتى ەسەپكە الىنادى.
كەدەي ادام قۇرباندىق شالۋ نيەتىمەن ءبىر قوي ساتىپ السا، وعان سول قۇرباندىقتى شالۋ ءۋاجىپ بولادى. ەگەر ساتىپ العان مالى ۇرلانسا نەمەسە جوعالسا، وعان ەشتەڭە مىندەت بولمايدى. نيەت ەتىپ العان قۇرباندىعىن شالماسا ءارى قۇربان شالۋ ۋاقىتى ءوتىپ كەتسە، بايعا ۇقساپ ساداقا بەرۋگە مىندەتتى بولادى.
ساتىپ العان قۇرباندىعىن باسقا ادام رۇقساتسىز باۋىزداسا، قۇرباندىعى دۇرىس سانالادى. ويتكەنى، يەسىنىڭ مالدى اۋەلدە قۇرباندىق نيەتىمەن ساتىپ العانى ەسەپكە الىنادى.
ءبىر كىسىدەن جەتى كىسىگە دەيىن بىرىگىپ، سيىر، نە تۇيە شالعاندا، ولاردىڭ ءارقايسىسى قۇرباندىقتى نيەت ەتۋلەرى ءتيىس. ارالارىنداعى بىرەۋى سوعىم نەمەسە ءجاي ەت الۋ نيەتىمەن قاتىسسا، ەشبىرەۋىنىڭ ۇلەسى قۇرباندىققا ەسەپتەلمەيدى.
قۇرباندىق ورنىنا ساداقا بەرۋگە بولا ما؟
قمدب مالىمەتىنشە، قۇربان ايت كۇندەرى قۇرباندىقتى باۋىزداماي، اقشاسىن ساداقا ەتە سالۋ دۇرىس ەمەس. ويتكەنى، شاريعات بويىنشا قۇرباندىق مالىن باۋىزداپ، قان اعىزۋ - مىندەت.
الايدا، ساتىپ العان قۇرباندىعىن ايت كۇندەرى شالا الماسا، ونى تىرىدەي ساداقا ەتەدى. ال ەگەر قۇرباندىقتى سويىپ قويعان بولسا، ونىڭ بارلىق ەتىن مۇقتاجدارعا تاراتادى، ءوزى ودان ەشتەڭە جەمەيدى. ويتكەنى، ۋاقىتى وتۋمەن قۇرباندىق مىندەتى ساداقا مىندەتىنە اۋىسادى. ەگەر قۇرباندىقتى ءالى ساتىپ الماعان بولسا، قۇرباندىق قۇنى مولشەرىندە ساداقا ەتەدى.
دەمەك، قۇرباندىق شالۋعا مىندەتتى بولعان ادام بەلگىلى مالدى باۋىزداپ قان شىعارۋى ءتيىس. ال قۇربان شالۋدىڭ ورنىنا ساداقا بەرۋ موينىنان ءۋاجىپتى تۇسىرمەيدى.
ايت نامازىنىڭ كەستەسى
ەسكە سالايىق، قازاقستاندا قۇرباندىق شالۋ ءراسىمىن قاشىقتان وتكىزۋگە ارنالعان سايت اشىلعان بولاتىن.
«بارشا قازاقستاندىقتاردى»قۇربان-2023«قايىرىمدىلىق اكسياسىنا ۇلەس قوسۋعا شاقىرامىز. حالىققا، اسىرەسە ءىرى قالالاردا تۇراتىن تۇرعىندارعا قولجەتىمدى بولۋ ءۇشىن بيىل سالتاناتتى ءراسىم وففلاين جانە ونلاين فورماتتا وتەدى»، - دەلىنگەن ق م د ب حابارلاماسىندا.
سايت ارقىلى قۇرباندىققا شالىناتىن مالدى تاڭداپ، قاجەتتى قاراجاتتى اۋدارۋعا بولادى. قوي مەن ەشكىگە ءبىر ادام تاپسىرىس بەرسە، ءىرى قارا مەن تۇيەگە ءبىر-جەتى ادام بىرگە تاپسىرىس بەرەدى. تولەۋ كەزىندە تاپسىرىس ءنومىرىن جانە جىبەرۋشىنىڭ اتىن كورسەتۋ كەرەك. قۇرباندىق شالعاننان كەيىن تاپسىرىس بەرۋشىگە فوتو جانە بەينە ەسەپ جىبەرىلەدى.
