تۇركى الەمىندە 2023 -جىل تەمىربەك جۇرگەنوۆ جىلى بولىپ جاريالاندى
بۇل تۋرالى بۇگىن مادەنيەت جانە سپورت ءمينيسترى داۋرەن ابايەۆتىڭ تۇركسوي باس حاتشىسى سۇلتان رايەۆپەن كەزدەسۋى كەزىندە ايتىلدى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.
تاراپتار بيىل بىرلەسە اتقارىلعان جۇمىستاردىڭ قورىتىندىسىن تالقىلاپ، كەلەر جىلعا ارنالعان ءىس- شارالار جوسپارىن قاراستىردى. قازاقستان تاراپىنىڭ ۇسىنىسىمەن 2023 -جىل تۇركى الەمىندە تەمىربەك جۇرگەنوۆ جىلى بولىپ جاريالاندى.
«تۇركسوي ىقپالىمەن تۇركى الەمىنىڭ ىنتىماقتاستىعى ساپالى جاڭا دەڭگەيگە كوتەرىلىپ كەلەدى. تاريحي- مادەني مۇرانى ساقتاۋعا ماڭىزدى ءمان بەرىلىپ وتىر. 2023 -جىلى حالىقارالىق تۇركى مادەنيەتى ۇيىمىنىڭ (تۇركسوي) قۇرىلعانىنا 30 جىل تولاتىنىن بىلەمىز. مەرەيتوي جىلى بارلىق باعىتتار بويىنشا جۇمىستى ودان ءارى جانداندىرىپ، بىرىگىپ جۇمىس ىستەۋگە دايىنبىز»، - دەدى داۋرەن ابايەۆ.
ايتا كەتەيىك، 2023 -جىلى سۇلتان بەيبارىستىڭ 800 جىلدىعىنا وراي تۇركسوي قولداۋىمەن فيلم شىعارۋ جانە ونى ۇيىمعا مۇشە مەملەكەتتەر اۋماعىندا كورسەتۋ جوسپارلانعان.
سونداي-اق، تۇركسوي دەڭگەيىندە تەاتر جانە كينو اكتريساسى بيكەن ريموۆانىڭ 100 جىلدىعى، جازۋشى ماعجان جۇمابايەۆتىڭ 130 جىلدىعى، قازاق اقىنى، ادەبيەتتانۋشى، جازۋشى مۇزافار الىمبايەۆتىڭ 100 جىلدىعى تۇركى تىلدەس ەلدەردە كەڭىنەن اتالىپ وتەدى.
ءوز كەزەگىندە سۇلتان رايەۆ ۇيىم اياسىنداعى بەلسەندى جۇمىسى ءۇشىن قازاقستان تاراپىنا العىس ءبىلدىردى جانە مەرەيتويلاردى جوعارى دەڭگەيدە وتكىزۋ تۇركسوي مەملەكەتتەرى اراسىنداعى بايلانىستاردى نىعايتۋعا زور ۇلەس قوساتىنىن ايتتى.
