ستۋدەنتتىك ليگا 2023 -جىلى سپورتتىڭ قاي تۇرلەرىنەن وتەدى
بۇل جايىندا ق ر پرەمەر- ءمينيسترى ءاليحان سمايىلوۆتىڭ سەنات دەپۋتاتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
«مەكتەپ وقۋشىلارى اراسىندا سپورتقا دەگەن قۇلشىنىستى ىنتالاندىرۋ ماقساتىندا 2021 -جىلى ۇلتتىق مەكتەپ ليگاسى قۇرىلدى. ليگا مەكتەپ باعدارلاماسىنا ەنگەن سپورت تۇرلەرى بويىنشا 5-6, 7-8, 9-11-سىنىپتار اراسىندا وتكىزىلەدى. سايىستار مەكتەپ، اۋدان، وبلىس جانە رەسپۋبليكالىق دەڭگەيلەردە وتەدى. 2021- 2022 وقۋ جىلىندا ليگاعا 10 سپورت تۇرىنەن 1,9 ميلليون وقۋشى قاتىستى. 2020- 2021 وقۋ جىلىمەن سالىستىرعان قاتىسۋشىلار سانى 13,8 پايىز ءوستى»، - دەلىنگەن ۇكىمەت باسشىسىنىڭ جاۋابىندا.
ونىڭ اتاپ وتۋىنشە، 2020 وقۋ جىلىنان بەرى جوعارى وقۋ ورىندارىندا ەرلەر مەن ايەلدەر اراسىندا باسكەتبول، ۆولەيبول، ميني- فۋتبول، ۇستەل تەننيسى، قازاق كۇرەسى، توعىزقۇمالاق بويىنشا ستۋدەنتتىك سپورت ليگاسى وتكىزىلەدى.
سايىستار ۋنيۆەرسيتەت، ءوڭىر جانە رەسپۋبليكا دەڭگەيىندە كەزەڭ- كەزەڭىمەن ۇيىمداستىرىلادى.
«بيىلعى وقۋ جىلىندا ستۋدەنتتىك سپورت ليگاسىنا 65 كومانداعا جاساقتالعان 15 مىڭنان اسا ستۋدەنت قاتىستى. ستۋدەنتتىك ليگانى ۇيىمداستىرۋعا سپورت تۇرلەرىنەن رەسپۋبليكالىق فەدەراتسيالار دا بەلسەندى ارالاسۋدا. اتاپ ايتقاندا، فۋتبولدان، باسكەتبولدان جانە ۇستەل تەننيسىنەن ستۋدەنتتىك ليگانىڭ اقتىق كەزەڭدەرى ءتيىستى رەسپۋبليكالىق فەدەراتسيالاردىڭ قولداۋىمەن ءوتتى. 2023 -جىلى ستۋدەنتتىك سپورت ليگاسى ەرلەر مەن ايەلدەر اراسىندا ۆولەيبول، باسكەتبول، فۋتزال، ۇستەل تەننيسى، توعىزقۇمالاق، قازاقشا كۇرەس، شاحمات بويىنشا وتەدى»، - دەدى ءاليحان سمايىلوۆ.
