قازاقستاندا 2023-جىلى ىشكى جالپى ءونىمنىڭ ءوسىمى 4 پايىزعا جەتەدى
قاسىم-جومارت توقايەۆتىڭ توراعالىعىمەن وتكەن كەڭەستىڭ كۇن تارتىبىندە ەلىمىزدىڭ 2023-2027-جىلدارعا ارنالعان الەۋمەتتىك-ەكونوميكالىق دامۋىنىڭ بولجامى، سونداي-اق 2023-2025-جىلدارعا ارنالعان رەسپۋبليكالىق بيۋجەت جوباسىنا قاتىستى ماسەلەلەر قارالدى.
كەڭەسكە پرەمەر-مينيستر ءاليحان سمايىلوۆ، پرەزيدەنت اكىمشىلىگىنىڭ باسشىسى مۇرات نۇرتىلەۋ، ۇلتتىق بانك ءتوراعاسى عالىمجان ءپىرماتوۆ، پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ، پرەزيدەنت اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ، ەسەپ كوميتەتىنىڭ ءتوراعاسى ناتاليا گودۋنوۆا جانە ۇلتتىق ەكونوميكا ءمينيسترى الىبەك قۋانتىروۆ قاتىستى.
پرەمەر-مينيستر ۇسىنعان ماكروەكونوميكالىق كورسەتكىشتەر بويىنشا 2022-جىلى جالپى ىشكى ءونىمنىڭ ناقتى ءوسىمى 3 پايىزدان كەم بولمايدى. ال 2023-جىلى 4 پايىزعا جەتەدى.
پرەزيدەنت ۇسىنىلعان الەۋمەتتىك-ەكونوميكالىق دامۋ بولجامىنىڭ تەپە-تەڭدىگىن اتاپ ءوتتى. ۇكىمەتتىڭ دەرەكتەرىنە سايكەس، جالپى ىشكى ءونىمنىڭ نومينالدى ءوسىمى بيىلعى 103,6 تريلليون تەڭگەدەن 2023-جىلى 120,7 تريلليون تەڭگەگە دەيىن جەتەدى دەپ بولجانىپ وتىر. بولجام بويىنشا كەلەسى جىلى سالىق تۇسىمدەرىنىڭ ارتۋى ەسەبىنەن بيۋجەتتىڭ كىرىس بولىگى 10,5 تريلليون تەڭگەدەن 13,5 تريلليون تەڭگەگە دەيىن ۇلعايادى.
رەسپۋبليكالىق بيۋجەت جوباسىنىڭ وڭ اسپەكتىسى رەتىندە ۇلتتىق قوردان كەپىلدەندىرىلگەن ترانسفەرتتەردىڭ 2022-جىلعى 4 تريلليون تەڭگەدەن 2023-جىلى 2,2 تريلليون تەڭگەگە دەيىن كۇرت تومەندەۋىن ايتۋعا بولادى. ماكروەكونوميكالىق تۇراقتىلىققا شيكىزاتتىق ەمەس دەفيتسيتتىڭ 2023-جىلى 8,3 پايىزدان 6,8 پايىزعا دەيىن تومەندەۋى دە وڭ اسەر ەتەدى.
جيىن سوڭىندا قاسىم-جومارت توقايەۆ ۇكىمەت نازارىن تاعى دا قارجىنى ءتيىمدى جوسپارلاۋ مەن ۇلەستىرۋ قاجەتتىلىگىنە اۋداردى.
جالپى العاندا، پرەزيدەنت قازاقستان رەسپۋبليكاسىنىڭ 2023-2027-جىلدارعا ارنالعان الەۋمەتتىك-ەكونوميكالىق دامۋىنىڭ ۇسىنىلعان بولجامىن جانە 2023-2025-جىلدارعا ارنالعان رەسپۋبليكالىق بيۋجەت جوباسىن كەڭەس بارىسىندا تالقىلانعان ماسەلەلەردى جەتىلدىرۋدى ەسكەرتە وتىرىپ، قولدادى.
