قاتار-2022: قولا مەدال قاي قۇراماعا بۇيىرادى

استانا. قازاقپارات - قاتاردا ءوتىپ جاتقان فۋتبولدان 2022 -جىلعى الەم چەمپيوناتىندا بۇگىن، 17-جەلتوقساندا جارتىلاي فينالدا حورۆاتيا مەن ماروككو قولا جۇلدەنى ساراپقا سالادى، دەپ حابارلايدى قازاقپارات ءتىلشىسى.

كەزدەسۋ ەلوردا ۋاقىتىمەن 17-جەلتوقساندا ساعات 21:00 دە باستالادى.

تىكەلەي ەفير «Qazaqstan» جانە «Qazsport» تەلەارنالارىنان كورسەتىلەدى.

كەزدەسۋ ەل استاناسى دوحا قالاسىنداعى 45857 جانكۇيەرگە ارنالعان «حاليفا ينتەرنەيشنل» ستاديونىندا وتەدى. باس تورەشى - قاتارلىق ابدۋلراحمان ال-دجاسسيم. وعان وتانداستارى تالەب ال- مارري مەن ساۋد ال- ماكالەح كومەكشىلىك جاسايدى. قوسالقى تورەشى برازيليالىق رافاەل كلاۋس.

FIFA رەيتينگىندە حورۆاتيا 12، ماروككو 22-ورىندا تۇر.

ەكى قۇراما بۇعان دەيىن ەكى مارتە كەزدەستى. 1996 -جىلى وتكەن جولداستىق كەزدەسۋدە 2:2 ەسەبى تىركەلىپ، ويىن سوڭىنداعى پەنالتيدە حورۆاتيالىقتار 7:6 ەسەبىمەن جەڭىسكە جەتتى. بيىلعى الەم چەمپيوناتىندا F توبىندا ويناعان ولار 0:0 ەسەبىنە قاناعات ءبىلدىردى.

توپتىق كەزەڭدە حورۆاتيا ماروككودان وزگە كانادانى 4:1 ەسەبىمەن جەڭسە، بەلگيامەن 0:0 ەسەبىمەن تەڭ ءتۇستى. ودان كەيىن جارىستىڭ كەلەسى ساتىلارىندا جاپونيا جانە برازيليامەن 1:1 ەسەبىمەن تەڭ ويناعانمەن پەنالتيدەن قاپى قالدىرىپ كەتتى. جارتىلاي فينالدا ارگەنتيناعا 0:3 ەسەبىمەن جول بەردى.

توپتىق كەزەڭدە ماروككو حورۆاتيادان وزگە بەلگيانى 2:0، كانادانى 2:1 ەسەبىمەن جەڭدى.

1/8 فينالدا يسپانيامەن 0:0 ەسەبىمەن تەڭ ويناپ، پەنالتي تەبۋدەن مەرگەندىك تانىتتى. ال، شيرەك فينالدا پورتۋگاليانى 1:0 ەسەبىمەن جەڭسە، جارتىلاي فينالدا فرانسياعا 0:2 ەسەبىمەن ەسە جىبەردى.