قاتار-2022: نيدەرلاند قۇراماسىن جولدان تايدىرعان ارگەنتينا جارتىلاي فينالعا شىقتى
ارگەنتينانىڭ وسىعان دەيىن ءوز تاريحىندا 1978 جانە 1986-جىلعى دۇنيەجۇزىلىك دودالاردا توپ جارعانى بەلگىلى.
نيدەرلاند فۋتبولشىلارىنىڭ الەم چەمپيوناتتارىنىڭ فينالىندا جولى بولماي جۇرگەنى ءمالىم. ولار ءۇش مارتە سوڭعى باسەكەگە شىققانىمەن، بىردە-ءبىر رەت جەڭىس تۇعىرىنا كوتەرىلە المادى.
بۇعان دەيىن قوس كوماندانىڭ ءوزارا جولدارى توعىز رەت توقايلاسىپ، تورتەۋىندە نيدەرلاندىقتار، بىرەۋىندە ارگەنتينالىقتار جەڭىسكە جەتكەن، ءتورت رەت تەڭ تارقاسقان. سونىڭ ىشىندە 2014-جىلى برازيليادا وتكەن چەمپيوناتتا ارگەنتينا نيدەرلاند قۇراماسىن جارتىلاي فينالدا 0:0 ەسەبىمەن بىتكەن ماتچتا پەنالتي سەرياسىندا عانا ۇتىپ، قاپىدا قالدىرعان بولاتىن. سودان بەرى ءبىراز ۋاقىت ءوتىپ، كوپتەگەن وزگەرىستەر بولعانىمەن، ارگەنتينانىڭ جارىق جۇلدىزى، 35 جاستاعى ليونەل مەسسي ءالى دە ساپتا.
ءبىرىنشى تايمدا ەسەپ ءدال سول مەسسيدىڭ قاتىسۋىمەن اشىلدى. ناۋەل مولينادان دوپ العان مەسسي ايىپ الاڭىنا قاراي جاقىنداپ، ارىپتەسىنە قايتا ءدال پاس بەردى. قاقپاشى اندريس نوپپەرتپەن بەتپە-بەت شىققان مولينا ءمۇلت كەتكەن جوق - 1:0.
ەكىنشى كەزەڭدە 71-مينۋتتا نيدەرلاندتىق قورعاۋشى دەنزەل دۋمفريس ءوز ايىپ الاڭىندا ماركوس اكۋنيانى شالىپ شىقتى. 73-مينۋتتا مەسسي 11 مەترلىك نۇكتەدەن ەسەپتى 2:0-گە جەتكىزدى. بۇل مەسسيدىڭ الەم چەمپيوناتتارىنداعى ونىنشى گولى ەدى.
دەگەنمەن 83-مينۋتتا وڭ قاناتتان ستيەۆەن بەرگحەيس اسىرعان دوپتى ۆۋت ۆەگحورست باسپەن توردا تۋلاتىپ، ەسەپتى قىسقارتتى - 1:2. بۇلاردىڭ ەكەۋى دە تىڭنان قوسىلعان ويىنشىلار ەدى. قوسىمشا ۋاقىت اياقتالار تۇستا (90+11) نيدەرلاندتىقتار ايىپ دوبىن ورىنداعاندا، ۆۋت ۆەگحورست تارازى باسىن تەڭەستىرىپ كەتتى - 2:2.
بۇدان كەيىن ەكى ەكستراتايمدا ارگەنتينالىقتار كوبىرەك قاۋىپ توندىرگەنىمەن، ەسەپ وزگەرمەي، ماتچ تاعدىرى پەنالتي سەرياسىندا شەشىلدى. وندا ارگەنتينا قاقپاشىسى ەميليانو مارتينەس قاتارىنان ەكى پەنالتيدى قايتاردى.
وسىلايشا، پەنالتي سەرياسىندا نيدەرلاند قۇراماسىن 4:3 ەسەبىمەن ۇتقان ليونەل سكالونيدىڭ شاكىرتتەرى 13- جەلتوقسان كۇنى فينالعا شىعۋ ءۇشىن حورۆاتيا قۇراماسىمەن تالاسادى.
ەسكە سالا كەتەيىك، بۇدان بۇرىن برازيليانىڭ باس باپكەرى ورنىن بوساتقانىن جازعان بولاتىنبىز.
سونداي-اق ليونەل مەسسي الەم چەمپيوناتتارىنداعى ونىنشى گولىن سوقتى.
