سايلاۋ-2022: كانديداتتار اراسىنداعى تەلەدەبات قاي تىلدە وتەدى

استانا. قازاقپارات – ق ر ورتالىق سايلاۋ كوميسسياسىنىڭ مۇشەسى اسىلبەك سماعۇلوۆ پرەزيدەنتتىككە كانديداتتار اراسىنداعى تەلەۆيزيالىق پىكىرسايىس قانشا ۋاقىتقا سوزىلاتىنىن ايتتى، دەپ حابارلايدى قازاقپارات ءتىلشىسى.

«تەلەۆيزيالىق پىكىرسايىس «حابار» تەلەارناسىندا وتەدى. ۇزاقتىعى 80 مينۋتتان كەم بولمايدى. كىم قاي تىلدە سويلەگىسى كەلەدى، قاي تىلدە سۇراق قويعىسى كەلەدى، سول تىلدە وتەدى. مىسالى، سايلاۋشىلاردىڭ اتىنان دا سۇراقتار كەلىپ ءتۇسۋى مۇمكىن. سۇراق قاي تىلدە قويىلسا، سول تىلدە جاۋاپ بەرەدى»، - دەدى ول و س ك وتىرىسىنان كەيىن ۇيىمداستىرىلعان باسپا ءسوز ءماسليحاتىندا.

ال «حابار» اگەنتتىگى» ا ق باسقارما ءتوراعاسىنىڭ ورىنباسارى داۋلەتحان جيەنقۇلوۆ تەلەۆيزيالىق پىكىرسايىس ۋاقىتى سوزىلۋى مۇمكىن ەكەنىن جوققا شىعارمادى.

«تەلەدەبات كەمىندە 80 مينۋت بولادى دەپ وتىرمىز. ول كانديداتتاردىڭ باعدارلاماسىن تانىستىرۋىنا، سۇراقتارعا جاۋاپ بەرۋىنە بايلانىستى ۇزارىپ كەتۋى دە مۇمكىن. سوندىقتان كانديداتتارعا قانداي دا ءبىر شەكتەۋ بولادى دەپ ويلامايمىن»، - دەدى ول.

سونىمەن قاتار داۋلەتحان جيەنقۇلوۆ اگەنتتىكتىڭ ەلەكتروندى پوشتاسىنا سايلاۋشىلاردان سۇراقتار كەلىپ ءتۇسىپ جاتقانىن جەتكىزدى.

«سۇراقتار ۆيدەو فورماتتا بولادى. كەز كەلگەن ازامات ءوزى تاڭداعان كانديداتقا ساۋالىن جولداي الادى. كىمنەن كەلسە دە، سۇراق قويىلادى. ساۋالدىڭ تىكەلەي ەفيردە قويىلۋىنا رەگلامەنت مۇمكىندىك بەرمەيدى»، - دەدى تەلەارنا وكىلى.