فۋتبولدان ءا چ-2022: قازاقستان قۇراماسى ۋكراينامەن تەڭ ءتۇستى
بۇگىنگى ويىندى ۋكراين فۋتبولشىلارى قارقىندى باستادى. العاشقى مينۋتتان شابۋىلعا شىعۋ جولىن ىزدەدى. دەسە دە، وعان قازاقستاندىق قورعاۋشىلار لايىقتى قارسىلىق كورسەتتى.
بىرنەشە قاۋىپتى ساتتەردە ساۋاتتى قورعانا ءبىلدى. ويىننىڭ 20-مينۋتىندا ۋكرايندىق رومان يارەمچۋك ءوزىنىڭ مۇمكىندىگىن تولىق پايدالانىپ كەتتى.
وسىلايشا الاڭ يەلەرى العا شىقتى. ەكىنشى كەزەڭدە ەكى قۇراما دا بىردەن العا ۇمتىلدى. ۋكرايندىق فۋتبولشىلار ەسەپتى ۇلعايتۋدى كوزدەسە، قازاقستاندىقتار تارازى باسىن تەڭەستىرۋدى ماقسات تۇتتى.
وسىنداي ساتتەردىڭ بىرىندە 59-مينۋتتا سەرىكجان مۋجيكوۆ كوزدەگەن نىسانادان ءمۇلت كەتكەن جوق. كەزدەسۋ 1:1 ەسەبىمەن تەڭ اياقتالدى.
وسىلايشا قازاقستان قۇراماسى ىرىكتەۋ ساتىسىنداعى العاشقى ۇپايىنا قول جەتكىزدى. اتالعان توپتا فرانسيا سىرت الاڭدا بوسنيا جانە گەرتسوگوۆينادان 1:0 ەسەبىمەن باسىم ءتۇستى.
ايتا كەتەيىك، قازاقستاندىق قۇراما ىرىكتەۋ ساتىسىندا D توبىندا سىنعا تۇسەدى. قارسىلاستارى - فرانسيا، ۋكراينا، بوسنيا جانە گەرتسوگوۆينا، فينليانديا.
ەندى اتالعان توپتاعى ويىندار 1- قىركۇيەكتە وتكىزىلەدى. بۇل كۇنى ءوز الاڭىندا قازاقستان ۋكراينانى قابىلداسا، بوسنيا جانە گەرتسوگوۆينا فرانسيامەن شەبەرلىك بايقاسادى.
