وليمپيادا-2022: الماتى-بەيجىڭ. كىم جەڭىسكە جەتەدى؟
بۇل كۇندى قازاقستاندىقتار اسىعا كۇتۋدە. سەبەبى، ايتۋلى دودانى وتكىزۋگە ەلىمىزدىڭ الماتى قالاسى باستى ۇمىتكەر قالالاردىڭ ءبىرى اتاندى.
الەمدىك ماڭىزعا يە ايتۋلى سپورت دوداسىن وتكىزۋ ءۇشىن اۋەل باستا الەمنىڭ ونشاقتى ەلى ءوز وتىنىشتەرىن بىلدىرگەن. الايدا، ۋاقىت وتە كەلە كوپشىلىگى وتىنىمدەرىن كەرى قايتارىپ الدى. سوڭىندا ەكى قالا - الماتى مەن قىتاي استاناسى بەيجىڭ قالالارى ۇمىتكەر رەتىندە قالدى.
مىنە، 31- شىلدەدە مالايزيانىڭ كۋالا-لۋمپۋر قالاسىندا ح و ك 2022-جىلعى قىسقى وليمپيادا ويىندارىن وتكىزۋگە الماتى مەن بەيجىڭنىڭ قايسىسى لايىق ەكەنى انىقتالاتىن بولادى. ح و ك مۇشەلەرىنىڭ تاڭداۋى الماتىعا تۇسە مە، الدە قىتاي استاناسى بەيجىڭگە تۇسە مە ءبىز مۇنى سول كۇنى بىلەتىن بولامىز.
قارسىلاسىمىز وسال قالا ەمەس ەكەنى ايتپاساق تا بەلگىلى. ولار 2008-جىلى جازعى وليمپيادا ويىندارىن وتكىزدى. جازعى وليمپيادانى وتكىزۋگە مۇمكىندىگى بولعان ەلدىڭ قىسقى وليمپيادانى وتكىزۋگە دە قاۋقارى جەتەتىنى انىق. ءبىراق، الماتى دا بارلىق تالاپتارعا ساقاداي-ساي دەۋگە بولادى. ايتكەنمەن، باق شابا ما، باپ شابا ما، مۇنى ساناۋلى كۇندەردەن كەيىن بىلەتىن بولامىز.
وسىعان وراي، 31- شىلدە كۇنى ساعات 15:00 دە الماتىداعى اباي الاڭىندا كۋالا-لۋمپۋردا وتەتىن حالىقارالىق وليمپيادا كوميتەتىنىڭ سەسسياسىنان تىكەلەي كورسەتىلىم ۇيىمداستىرىلادى. وندا الداعى وليمپيادا ويىندارىن وتكىزەتىن ەل بەلگىلى بولادى. قالا تۇرعىندارى مەن قوناقتارى اتالعان ۋاقىتتا الماتى كانديداتۋراسىن قولداۋ ءۇشىن الاڭعا جينالماق. ال الماتىنى قولداۋ ءۇشىن ەلىمىزدىڭ تانىمال كوپتەگەن سپورتشىلارى مالايزياعا اتتانىپ كەتتى. ولاردىڭ قاتارىندا بوكستان وليمپيادا چەمپيوندارى ەرماحان ىبىرايىموۆ، سەرىك ساپيەۆ جانە كونكيدەن الەم چەمپيونى دەنيس كۋزين، سوچيدەگى قىسقى وليمپيادانىڭ جۇلدەگەرى، مانەرلەپ سىرعاناۋشى دەنيس تەن، تانىمال ۆولەيبولشى ءسابينا التىنبەكوۆا جانە تاعى باسقا بەلگىلى سپورتشىلار بار.
ەندى وسىعان دەيىنگى قىسقى وليمپيادا ويىندارىنىڭ تاريحىنا قىسقاشا كوز جۇگىرتىپ وتەيىك.
1924
I قىسقى وليمپيادا ويىندارى فرانسيانىڭ شاموني قالاسىندا ءوتتى. العاش رەت ۇيىمداستىرىلعان دوداعا الەمنىڭ 16 ەلىنەن 280 سپورتشى قاتىستى.
1928
Ⅱ قىسقى وليمپيادا ويىندارى شۆەيتساريانىڭ سانكت-موريتس قالاسىندا ۇيىمداستىرىلدى. 25 ەلدەن 464 سپورتشى جارىسقا ءتۇستى.
1932
Ⅲ قىسقى وليمپيادا ويىندارى ا ق ش- تىڭ لەيك-پلەسيد قالاسىندا وتكىزىلدى. 17 ەلدەن كەلگەن 252 سپورتشى باقتارىن سىنادى.
1936
ІV قىسقى وليمپيادا ويىندارىن گەرمانيانىڭ گارميش-پارتەنكيرحەن قالاسى قابىلدادى. جۇلدەگە الەمنىڭ 28 ەلىنەن كەلگەن 646 سپورتشى تالاستى.
1948
V قىسقى وليمپيادا ويىندارىنىڭ الاۋى شۆەيتساريانىڭ سانكت-موريتس قالاسىندا ەكىنشى رەت تۇتاندى. بۇل باسەكەدە 28 ەلدەن 669 سپورتشى باقتارىن سىنادى.
1952
VI قىسقى وليمپيادا ويىندارىن نورۆەگيا استاناسى وسلو قابىلدادى. 30 ەلدەن 694 سپورتشى سىنعا ءتۇستى.
1956
VIІ قىسقى وليمپيادا ويىندارىن يتاليانىڭ كورتينا د'امپەتستسو قالاسى قابىلدادى. 32 ەلدەن 821 سپورتشى قاتىستى.
1960
VIІІ قىسقى وليمپيادا ويىندارى ا ق ش- تىڭ سكۆو-ۆەلي قالاسىندا ءوتتى. 30 ەلدەن 665 سپورتشى جارىس جولىنا شىقتى.
1964
Ⅸ قىسقى وليمپيادا ويىندارى اۆستريانىڭ ينسبۋرك قالاسىندا الاۋىن تۇتاتتى. بايراقتى باسەكەگە 36 ەلدەن 1091 سپورتشى كەلدى.
1968
Х قىسقى وليمپيادا ويىندارىن وتكىزۋ فرانسيانىڭ گرەنوبل قالاسىنا بۇيىردى. 37 ەلدەن كەلگەن 1158 ساڭلاق جۇلدە ءۇشىن تالاسقا ءتۇستى.
1972
Ⅺ قىسقى وليمپيادا ويىندارى جاپونيانىڭ ساپپورو قالاسىندا ءوتتى. 35 ەلدىڭ 1006 سپورتشىسى قاتىستى.
1976
ХІІ قىسقى وليمپيادا ويىندارىن اۆستريانىڭ ينسبۋرك قالاسى قابىلدادى. 37 ەلدەن كەلگەن 1123 سپورتشى جۇلدەگە تالاستى.
1980
ⅩⅢ قىسقى وليمپيادا ويىندارىنىڭ الاۋى ا ق ش- تىڭ لەيك-پلەسيد قالاسىندا تۇتاندى. 37 ەلدىڭ ءۇمىتىن ارقالاعان 1072 سپورتشى باسكە ءتۇستى.
1984
XIV قىسقى وليمپيادا ويىندارىن بۇرىنعى يۋگوسلاۆيا مەملەكەتىنىڭ سارايەۆو قالاسى قابىلدادى. 49 ەلدەن 1272 سپورتشى قاتىستى.
1988
XV قىسقى وليمپيادا ويىندارى كانادانىڭ كالگاري قالاسىندا ءوتتى. الەمنىڭ 57 ەلىنەن 1423 سپورتشى سىنعا ءتۇستى.
1992
XVІ قىسقى وليمپيادا ويىندارى فرانسيانىڭ البەرۆيل قالاسىندا ۇيىمداستىرىلدى. 64 ەلدەن 1801 سپورتشى كەلدى.
1994
XVІІ قىسقى وليمپيادا ويىندارىن نورۆەگيانىڭ ليللەحامەر قالاسى قابىلدادى. الەمنىڭ 69 ەلىنەن 1739 سپورتشى كەلدى. بايراقتى باسەكەدە قازاقستان قۇراماسى تۇڭعىش رەت قاتىستى. اتاقتى شاڭعىشى ۆلاديمير سميرنوۆ 1 التىن، 2 كۇمىس جەڭىپ الدى. جالپى كوماندالىق ەسەپتە قازاقستان 12- ورىنعا ورنالاستى.
1998
XVІІІ قىسقى وليمپيادا ويىندارىنىڭ الاۋى جاپونيانىڭ ناگانو قالاسىندا تۇتاندى. 72 ەلدەن 2302 سپورتشى قاتىستى. قازاقستان قۇراماسىنان شاڭعىشى ۆلاديمير سميرنوۆ پەن كونكيمەن جۇگىرۋشى ليۋدميلا پروكاشيەۆا قولا مەدال جەڭىپ الدى. جالپى كوماندالىق ەسەپتە بەلارۋس رەسپۋبليكاسىمەن 20-21 ورىنداردى ءبولىستى.
2002
XІХ قىسقى وليمپيادا ويىندارى ا ق ش- تىڭ سولت-لەيك-سيتي قالاسىندا ءوتتى. 77 ەلدەن 2390 سپورتشى كەلدى. قازاقستاندىق سپورتشىلار بۇل وليمپيادادا جۇلدە الا المادى.
2006
XХ قىسقى وليمپيادا ويىندارى يتاليانىڭ تۋرين قالاسىندا جالاۋىن جەلبىرەتتى. جارىس جولىنا الەمنىڭ 80 ەلىنەن كەلگەن 2508 سپورتشى جارىس جولىنا شىقتى. بۇل جولى دا قازاقستاندىق سپورتشىلارعا جۇلدە بۇيىرمادى.
2010
ХХІ قىسقى وليمپيادا ويىندارىن كانادانىڭ ۆانكۋۆەر قالاسى قابىلدادى. 82 ەلدەن 2766 سپورتشى سىنعا ءتۇستى. قازاقستاندىق بياتلونشى ەلەنا حرۋستاليەۆا جەكەلەي سىندا كۇمىس مەدالدى جەڭىپ الدى. جالپى كوماندالىق ەسەپتە قازاقستان مەن ەستونيا ەلدەرى 25-26 ورىندى ءوزارا ءبولىستى.
2014
ХХІІ قىسقى وليمپيادا ويىندارىن رەسەيدىڭ سوچي قالاسى قابىلدادى. بايراقتى باسەكەگە الەمنىڭ 90 ەلىنەن 2800 سپورتشى قاتىستى. قازاقستان نامىسىن بۇل دودادا 52 سپورتشى قورعادى. سوچيدە مانەرلەپ سىرعاناۋدان ەرلەر اراسىنداعى جەكەلەي باسەكەدە دەنيس تەن قوس باعدارلامادا 255,1 ۇپاي جيناپ، قازاقستان قورجىنىنا قولا جۇلدەنى سالدى. وسىلايشا 2014-جىلى قازاقستان جالپى كوماندالىق ەسەپتە 26-ورىندى يەلەندى.
ەستەرىڭىزگە سالا كەتەيىك، ХХІІІ قىسقى وليمپيادا ويىندارى پحەنچحاندا (وڭتۇستىك كورەيا) 2018-جىلى 9- اقپاندا وتەدى.
كۇنسۇلتان وتارباي
