الماتىدا 2022-جىلعا قاراي بىرنەشە كولىك حابى قۇرىلادى
ونىڭ ايتۋىنشا، ءوتىنىم بەرۋ كوميسسياسىنىڭ ازىرلەگەن بۇل تۇجىرىمداماسى ەگەر الماتى قالاسى 2022-جىلعى قىسقى وليمپيادا ويىندارىنىڭ استاناسىنا اينالار بولسا، سپورتشىلاردى، دەلەگاتسيا مۇشەلەرىن جانە كورەرمەندەردى تەز تاسىمالداۋدا شەشۋشى رول اتقارادى.
«ارينە، بۇل تۇجىرىمداما وليمپيادا ويىندارى ءۇشىن ازىرلەندى. ول وسىنداي الەمدىك سپورتتىق شارالاردى وتكىزۋگە قاتىستى بارلىق تالاپتارعا جاۋاپ بەرە الادى. ءبىز وسى تۇجىرىمداما ارقىلى وليمپيادانىڭ الماتى قالاسىنىڭ دامۋى ءۇشىن وتە كەرەك ەكەندىگىنە باعالاۋ كوميسسياسى مۇشەلەرىنىڭ كوزىن جەتكىزەمىز دەگەن ۇمىتتەمىن. ويتكەنى، وليمپيادانى وتكىزۋدە ونىڭ ماڭىزدى رول اتقاراتىنى ءسوزسىز. دەگەنمەن، وليمپيادا بولسىن، بولماسىن ءبىز قالانىڭ كولىك جۇيەسىن ءبارىبىر دامىتۋىمىز قاجەت. سوندىقتان بۇل تۇجىرىمداما و باستا جوسپارلانعان جوبالاردىڭ جيىنتىعى دەسە دە بولدى. ونىڭ ۇستىنە ول ۋنيۆەرسيادا ويىندارى ءۇشىن دە كەرەك»، - دەدى ە. ەرزاكوۆيچ.
ونىڭ ايتۋىنشا ەگەر الماتىدا 2022-جىلى قىسقى وليمپيادا ويىندارى وتكىزىلەتىن بولسا، وندا قالادا كولىك قوزعالىسىنىڭ كولەمى التى ەسەگە ارتادى.
«سوندىقتان قالادا كەم دەگەندە ءۇش كولىك حابىن، ياعني كولىك تورابىن قۇرۋ جوسپارلانىپ وتىر. ول بويىنشا جانكۇيەرلەر جينالاتىن ارنايى ايالدامالار مەن اۆتوتۇراقتار ازىرلەنەدى. سول جەرگە ءوز كولىكتەرىمەن جەتكەن ادامدار، كولىكتەرىن قالدىرىپ، ارنايى الاڭعا جينالادى. سول جەردە ولار اۆتوبۋستار ارقىلى ارنايى بەلگىلەنگەن جولاقتارمەن سپورت نىساندارىنا دەر كەزىندە جەتكىزىلىپ وتىرادى. وليمپيادا ويىندارى بارىسىندا مۇنداي جولاقتارمەن باسقا كولىكتەردىڭ ءجۇرۋى بارىنشا قىسقارتىلادى. بۇل - جالپى الەمدىك تاجىريبە. ويتكەنى، مۇنداي الەمدىك ويىندار بارىسىندا ءوز كولىگىڭمەن سپورت نىساندارىنا جەتۋ مۇمكىن ەمەس دەسە دە بولادى»، - دەدى ءوز سوزىندە ە. ەرزاكوۆيچ.
سونىمەن قاتار ول وسى تۇجىرىمداماعا سايكەس، قىسقى وليمپيادا ءۇشىن «تاۋ كلاستەرى» دە ۇيىمداستىرىلاتىندىعىن جەتكىزدى.
«تاۋ كلاستەرى» قىسقى وليمپيادانىڭ ماڭىزدى بولىگى. بۇل جەردە سپورت نىساندارىنىڭ ءبىر-بىرىنە جاقىن ورنالاسۋىنا، كورەرمەندەر، سپورتشىلار جانە جۋرناليستەردى ءبىر نىساننان ەكىنشى نىسانعا دەر كەزىندە جەتكىزۋ ماسەلەسىنە كوپ كوڭىل بولىنەدى. سوندىقتان، بۇگىن باعالاۋ كوميسسياسى بىزگە تاۋلى اۋماقتا دا جۋرناليستەر ءۇشىن تاعى ءبىر مەدياورتالىق اشۋ جاعىن قاراستىرۋعا كەڭەس بەردى. ارينە بۇل سىندارلى ۇسىنىس. باستى ماقسات - قىسقى سپورت ويىندارىنىڭ لايىقتى ناسيحاتتالۋىنا جاعداي جاساۋ»، - دەدى ە. ەرزاكوۆيچ.
اۆتور: جاپپاربەرگەن ايبوتا
