قازاقستاندا 2022 -جىلى 3 ميلليون ادامنىڭ جالاقىسى ءوستى

استانا. قازاقپارات - الەۋمەتتىك سالانى دامىتۋ، حالىقتىڭ دەنساۋلىعىن جاقسارتۋ، ازاماتتاردى جۇمىسپەن قامتۋ - مەملەكەتتىك ساياساتتىڭ باسىم باعىتتارىنىڭ ءبىرى.

بيىل ەلىمىزدە اشىلعان جاڭا مەكتەپتەر، اۋرۋحانالار مەن مادەني- قوعامدىق نىسانداردىڭ سانى ارتتى. الەۋمەتتىك تولەمدەردىڭ دە كولەمى ءوستى. الەۋمەتتىڭ جاعدايىن جاقسارتقان جاڭاشىلدىقتار تۋرالى تولىعىراق قازاقپارات ساراپشىسىنىڭ ماتەريالىندا.

دەنساۋلىق ساقتاۋ سالاسى: ءولىم-ءجىتىم 28 پايىزعا ازايدى

دەنساۋلىق ساقتاۋ جۇيەسى - قوعامنىڭ الەۋمەتتىك ءومىرىنىڭ ەڭ ماڭىزدى سالاسى. ەلىمىزدە ەمحانالار، جالپى دەنساۋلىق ساقتاۋ سالاسىنا قاتىستى نىساندار قاتارى ارتىپ كەلەدى. بيىل جاڭادان 87 العاشقى مەديتسينالىق- سانيتارلىق كومەك نىسانى ىسكە قوسىلدى. ونىڭ ىشىندە 4 ەمحانا، 24 دارىگەرلىك امبۋلاتوريا، 11 فەلدشەرلىك- اكۋشەرلىك پۋنكت جانە 43 مەديتسينالىق پۋنكت بار. ولاردىڭ باسىم بولىگى اۋىلدىق جەرلەردە اشىلعان.

انا مەن بالا ءولىمىن ازايتۋ ماقساتىندا تۇقىم قۋالايتىن اۋرۋلاردى انىقتاۋ ءۇشىن جاڭا تۋعان نارەستەلەردى سكرينينگتەن وتكىزۋ بويىنشا پيلوتتىق جوبا ىسكە قوسىلدى. «جاردەم» جانە «سالاماتتى قازاقستان» مەديتسينالىق پويىزدارىنىڭ جۇمىسى قايتا جانداندى. ولار شالعايداعى تۇرعىندارعا مەديتسينالىق كومەك كورسەتتى. ەل تۇرعىندارى جەدەل جاردەم قىزمەتىن 4 ميلليون رەت شاقىرعان. ال ءمامس جۇيەسى ارقىلى (مىندەتتى الەۋمەتتىك مەديتسينالىق ساقتاندىرۋ ەسەبىنەن) 18 مىڭنان استام كۇردەلى مەديتسينالىق قىزمەت جانە 1 ميلليوننان استام قىمبات مەديتسينالىق قىزمەت كورسەتىلگەن. ناتيجەسىندە جالپى ءولىم-ءجىتىم 2021 -جىلمەن سالىستىرعاندا 28 پايىزعا، انا ءولىمى 3,5 ەسە تومەندەگەن.

مەملەكەت باسشىسىنىڭ تاپسىرماسى بويىنشا بيىل «اۋىلدىق دەنساۋلىق ساقتاۋدى جاڭعىرتۋ» اتتى جاڭا ۇلتتىق جوبا بەكىتىلدى، ونىڭ اياسىندا 2026 -جىلعا دەيىن 655 العاشقى مەديتسينالىق- سانيتارلىق كومەك نىسانىن سالۋ، رەكونسترۋكتسيالاۋ جانە جاراقتاندىرۋ، 12 اۋرۋحانانى جاڭعىرتۋ جانە 20 جاڭا كوپ سالالى اۋداندىق اۋرۋحانا اشۋ جوسپارلانىپ وتىر.

ءبىلىم سالاسى: 400 جاڭا مەكتەپ سالىنباق

ەلىمىزدە 2022 -جىلى 453 بالاباقشا اشىلدى. ناتيجەسىندە بالالاردى مەكتەپكە دەيىنگى بىلىممەن قامتۋ ۇلەسى 98,4 پايىزدى قۇرادى. 106 مىڭ وقۋشىعا ارنالعان جاڭا 201 مەكتەپ پايدالانۋعا بەرىلدى. سونداي-اق بىلتىر پرەزيدەنتتىڭ تاپسىرماسىمەن «جايلى مەكتەپ» ۇلتتىق جوباسى قابىلداندى. 2025 -جىلعا دەيىن جاڭا فورماتتاعى 400 مەكتەپ سالىنباق. ولار قاجەتتى وقۋ جابدىقتارى، بەينەباقىلاۋ جانە دىبىستىق ەسكەرتۋ جۇيەلەرىمەن تولىقتاي جابدىقتالادى.

مۇنداي مەكتەپتەر ءبىرىڭعاي ستاندارت بويىنشا سالىنادى. جايلى مەكتەپتەردە ەرەكشە ءبىلىم الۋعا قاجەتتىلىگى بار بالالارعا جاعداي جاسالماق. ۇلتتىق جوبا ارقىلى ورىن تاپشىلىعىن بولدىرماۋ، اپاتتى جانە ءۇش اۋىسىممەن وقىتاتىن مەكتەپتەردى مۇلدەم جويۋ جوسپارلانعان. سونىمەن قاتار مۇعالىمدەردى دايارلاۋ جانە بىلىكتىلىگىن ارتتىرۋ جۇمىستارى جالعاسادى. جالپى 2026 -جىلعا قاراي 100 مىڭعا جۋىق مامان دايارلانادى دەپ كۇتىلۋدە.

تابىستى ارتتىرۋ: 3 ميلليوننان استام ازاماتتىڭ جالاقىسى ءوستى

الەۋمەتتىك سالانى ءسوز ەتكەندە، ازاماتتاردىڭ تابىسىن ارتتىرۋ ماسەلەسىن اينالىپ وتۋگە بولمايدى. 2022 -جىلى 3 ميلليوننان استام ادامنىڭ جالاقىسى ءوستى. دارىگەرلەردىكى 30 پايىزعا، مۇعالىمدەردىكى 25 پايىزعا، بيۋدجەت سالاسى قىزمەتكەرلەرىنىڭ ايلىعى 20 پايىزعا، وندىرىستىك قىزمەتكەرلەردىكى 10-50 پايىزعا ارتتى.

عالىمداردىڭ جالاقىسى 2 ەسە ارتىپ، عىلىممەن اينالىساتىن جاس مامانداردى قولداۋعا 1000 نان استام گرانت ءبولىندى. دارىندى عالىمدارعا (35 جاسقا دەيىن) جىل سايىن 50 مەملەكەتتىك عىلىمي ستيپەنديا بەرىلەدى، ال 2023 -جىلى ستۋدەنتتەر ستيپەندياسىن تاعى دا كوبەيتۋ جوسپارلانىپ وتىر. اۋىلداردا ەل حالقىنىڭ شامامەن 40 پايىزى تۇرادى، وسىعان بايلانىستى مەملەكەت باسشىسىنىڭ تاپسىرماسى بويىنشا تاياۋ بەس جىلدا شاعىن نەسيەلەندىرۋ قولجەتىمدى بولىپ، اۋىل تۇرعىندارىنىڭ تابىسىن ۇلعايتۋ جونىندەگى جوباعا 1 تريلليون تەڭگە بولىنەدى.

1 ميلليوننان استام ادام جۇمىسپەن قامتىلماق

ەلىمىزدە قازىرگى تاڭدا شامامەن 2,2 ميلليون زەينەتكەر بار. مەملەكەتتىك جاردەماقى الۋشىلار سانى - 1,8 ميلليون ادام. 2022 -جىلى 140 مىڭنان استام وتباسىنا نەمەسە 724 مىڭنان استام ادامعا اتاۋلى الەۋمەتتىك كومەك تاعايىندالدى. مەكتەپكە دەيىنگى جانە مەكتەپ جاسىنداعى 378 مىڭنان استام بالاعا كەپىلدەندىرىلگەن الەۋمەتتىك پاكەت بەرىلدى. بيىل 4,4 ميلليون ادام 4,6 تريلليون تەڭگەگە ۇلعايتىلعان الەۋمەتتىك تولەم الادى.

بۇل باعىتتا «وتباسىنىڭ سيفرلىق كارتاسىن» ەنگىزۋ بويىنشا جۇمىس جۇرگىزىلىپ جاتىر، ول پرواكتيۆتى فورماتتا بەلگىلەنەدى. وسى ارقىلى قازاقستاندىق وتباسىلاردىڭ الەۋمەتتىك تاۋەكەلدەرىنىڭ الدىن الۋ جۇيەسى ەنگىزىلمەك. ونى پيلوتتىق ىسكە اسىرۋ شەڭبەرىندە 2022 -جىلدىڭ 1-قىركۇيەگىنەن باستاپ 26 مىڭ ازاماتقا الەۋمەتتىك تولەم تاعايىندالدى.

ايتا كەتەيىك، مەملەكەت باسشىسىنىڭ تاپسىرماسى بويىنشا، ەلىمىزدە بالا كۇتىمىمەن بايلانىستى اقىلى دەمالىس مەرزىمى ءبىر جارىم جىلعا دەيىن ۇزارتىلدى. بۇگىنگى تاڭدا تولەم مولشەرى سوڭعى ەكى جىلداعى ورتاشا ايلىق تابىستىڭ 40 پايىزىن قۇرايدى. ەكى جانە ودان كوپ بالا تۋعان كەزدە تولەم ءاربىر بالاعا جەكە-جەكە تاعايىندالادى. بالا ومىرگە كەلگەننەن كەيىن رەسپۋبليكا ازاماتتارىنا اۆتوماتتى تۇردە ءبىرجولعى جاردەماقى تۇسەدى: ءبىرىنشى، ەكىنشى جانە ءۇشىنشى بالاعا - 38 ا ە ك (130 مىڭ تەڭگەدەن استام) جانە ءتورتىنشى بالاعا - 63 ا ە ك (217 مىڭ تەڭگەدەن استام).

سونداي-اق مەملەكەت ازاماتتاردى جۇمىسپەن قامتۋعا جاردەمدەسۋ شارالارىن تۇراقتى نەگىزدە ىسكە اسىرىپ، جەتىلدىرىپ كەلەدى. بىلتىر وسى جۇمىس اياسىندا 900 مىڭنان استام ادام جۇمىسقا ورنالاستىرىلعان. بيىل شامامەن 1 ميلليون ادامدى جۇمىسقا ورنالاستىرۋ جوسپارلانىپ وتىر.

2022 -جىل قازاقستاندىقتار ءۇشىن وڭاي بولعان جوق. دەسە دە، ەلىمىز ساياسي دامۋ مەن ەكونوميكالىق ترانسفورماتسيانىڭ جاڭا كەزەڭىنە اياق باستى. كۇردەلى سىرتقى ەكونوميكالىق جاعداي، ىشكى داعدارىسقا قاراماستان، ۇكىمەت الەۋمەتتىك سالانى جوسپارلى تۇردە دامىتۋدى جالعاستىرىپ كەلەدى. ەڭ باستىسى، ازاماتتاردىڭ ءومىر ءسۇرۋ ساپاسىن جاقسارتۋ بويىنشا جۇيەلى جۇمىستار جالعاسا بەرمەك.

اۆتور

ۆەنەرا جولامان قىزى