ۇ ب ت-2021: 21 تەست سۇراعى قاتە قۇراستىرىلعانى انىقتالدى
بۇل جايىندا ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ Facebook-تەگى پاراقشاسىندا جازدى، دەپ حابارلايدى قازاقپارات ءتىلشىسى.
«ءمينيستردىڭ تاپسىرماسىمەن تاجىريبەسى، جەتىستىكتەرى مەن كاسىبيلىگى تۇرعىسىنان ازىرلەۋشىلەرگە قويىلاتىن تالاپتار كۇشەيتىلدى. ءار تەست تاپسىرماسىنىڭ ساپاسى بويىنشا كەلىسىمشارتتا قوسىمشا جاۋاپكەرشىلىك ەنگىزىلىپ، جوسىقسىز ازىرلەۋشىلەردىڭ ءتىزىمى (قارا تىزىمگە) قۇراستىرىلدى. ياعني ول تىزىمگە كىرۋ - ۇلتتىق تەستىلەۋ ورتالىعى جۇمىسىنا قاتىسۋدىڭ كەز-كەلگەن مۇمكىندىگىن جويادى. سونداي-اق، ءبىز ورتالىقتىڭ ىشىندە دە ءتيىستى جۇمىستى جۇرگىزدىك. تەستولوگيا بويىنشا بىرنەشە وقىتۋ كۋرستارىن وتكىزىپ، ساراپشىلاردىڭ لاۋازىمدىق نۇسقاۋلىقتارىندا ءار تەستىنىڭ ساپاسىنا قاتىستى جاۋاپكەرشىلىكتى ارتتىردىق. سونىمەن قاتار تەستىلەۋدى ازىرلەۋدە ورتالىق قىزمەتكەرلەرىنىڭ تۋىستارىنىڭ قاتىسۋىنا تىيىم سالدىق»، - دەدى ول.
ورتالىق ديرەكتورىنىڭ اتاپ وتۋىنشە، اتالعان جۇمىستاردىڭ قازىردىڭ وزىندە ناقتى ناتيجەسى بار. ماسەلەن 2018 -جىلى اپەللياتسيا قورىتىندىسى بويىنشا - 101، 2019 -جىلى - 58، 2020 -جىلى - 27 تەست تاپسىرماسى قاتە بولعانى انىقتالعان. ال 2021 -جىلعى ناۋرىز ايىنداعى ۇ ب ت ناتيجەلەرى بويىنشا اپەللياتسيادا تەك 21 تەست تاپسىرماسى قاناعاتتاندىرىلدى.
«ونىڭ ۇستىنە جىلدان-جىلعا «ەستە ساقتاۋدى جاتتىقتىرۋعا» باعىتتالعان تاپسىرمالاردى ازايتىپ، فۋنكسيونالدىق ساۋاتتىلىققا، ياعني العان ءبىلىمدى ءىس جۇزىندە قولدانا بىلۋگە باسىمدىق بەرۋدەمىز. قازىردىڭ وزىندە مۇنداي تاپسىرمالاردىڭ 70 پايىزدان استامى دايىن. ال وسى جىلدىڭ جاڭالىعى - قازاقستان تاريحى مەن دۇنيەجۇزى تاريحى بويىنشا ناقتى داتالاردىڭ جاريالانۋى. تەك وسى داتالاردان عانا ساندارعا بايلانىستى سۇراقتار كەزدەسەدى. ولاردىڭ جالپى سانى ءار تەستىلەنۋشىگە تەك 2 ەۋ-3 ۋى عانا كەلەتىندەي ەتىپ قىسقارتتىق. ۇ ب ت- بۇل جاتتاپ الۋ دەگەن ءسوز ەمەس!»، - دەدى ديدار سماعۇلوۆ.
اۆتور: مارلان جيەمباي
