لاتىن گرافيكاسىنا نەگىزدەلگەن جاڭا الىپپە 2020 -جىلدان باستاپ ەنگىزىلۋى مۇمكىن
ق ر ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، مەكتەپتەردە لاتىن گرافيكاسىن ەنگىزۋ جۇمىسى ەكى جىلدان كەيىن باستالادى.
«ءدال قازىر لاتىن گرافيكاسىن ەنگىزۋ كەستەسى جوق. دەگەنمەن، جوسپار بويىنشا «0» - ىنشى سىنىپتان باستايمىز. وعان ەكى جىل بەرىلەدى. وسى جۇمىستى 2020 -جىلدا باستايمىز دەپ وتىرمىز. بارىمەن اقىلداسىپ، جان-جاقتى قاراستىرىپ، الىپپە دايىنداپ، ەڭ الدىمەن وسى جۇمىستى جاساپ، سوسىن ارى قاراي قاراستىراتىن بولامىز. سوندىقتان ءبىز لاتىن گرافيكاسىنا ۇلكەن اپروباتسيا جاساپ، جاڭا الىپپەنى دايىندايمىز. ودان كەيىن ونى ساراپتامادان وتكىزەمىز. سوسىن بارلىعىن مۇعالىمدەرمەن، مەكتەپ ديرەكتورلارىمەن، ساراپشىلارمەن كەڭىنەن تالقىلاۋىمىز قاجەت. ءسويتىپ، ناقتى ءبىر كەستەنى قابىلداپ، لاتىن گرافيكاسىن اسىقپاي ەنگىزۋىمىز كەرەك»، - دەدى ە. ساعاديەۆ جۋرناليستەرگە بەرگەن سۇحباتىندا.
ءمينيستردىڭ ايتۋىنشا، لاتىندى ەنگىزۋدى اسىقپاي باستاساق تا، ول جۇمىستى ۇزبەي جۇرگىزۋ كەرەك.
«ارينە، اسىقپاۋ قاجەت. الايدا ءبىر رەت باستاپ كەتكەننەن كەيىن توقتاۋعا بولمايدى، لاتىنعا تولىعىمەن كوشۋىمىز كەرەك. سوندىقتان قازىردەن باستاپ بارلىق ماسەلەلەردى ەسكەرگەن ءجون. لاتىن ءالىپبيىنىڭ جاڭا نۇسقاسى جاقسى. ماعان ۇنادى»، - دەپ اتاپ كورسەتتى ە. ساعاديەۆ.
