قازاقستان تاراپى 2020-جىلعا قاراي قىتايدان پاۆلودارعا جانە ومبىعا اۆتوكولىك ءدالىزىن سالادى

استانا. قازاقپارات - 2020-جىلعا قاراي قازاقستان تاراپى قىتايدان پاۆلودار جانە ومبى باعىتىنداعى ترانزيتتىك ءدالىزدى سالۋدى جوسپارلاپ وتىر.

بۇل تۋرالى بۇگىن استانادا ق ر ينۆەستيتسيالار جانە دامۋ ءبىرىنشى ۆيتسە-ءمينيسترى جەڭىس قاسىمبەك ءمالىم ەتتى.

«جالپى، ءبىزدىڭ 2020-جىلعا دەيىنگى جول قۇرىلىسى باعدارلاماسى تۇرعىسىندا قىتاي جاعىنان قوسىمشا ءبىر ءدالىزدى سالۋدى جوسپارلاپ وتىرمىز. وسى باعىتتا شىعىس قازاقستان ارقىلى پاۆلودار جانە ومبى باعىتىندا جولدىڭ قۇرىلىسى ەسكەرىلۋدە. بۇل جوبا 2020-جىلعا دەيىن تاپسىرىلادى»، - دەدى ج. قاسىمبەك قازاقستان پارلامەنتى سەناتى مەن رەسەي فەدەراتسيا كەڭەسىنىڭ اراسىنداعى ىنتىماقتاستىق جونىندەگى كوميسسيانىڭ سەگىزىنشى وتىرىسىندا.

ۆيتسە-مينيستر 2020-جىلعا دەيىن قازاقستان اۋماعىندا رەسپۋبليكالىق ماڭىزى بار 7 مىڭ شاقىرىمعا جۋىق جولدى قايتا سالۋ جوسپارلانىپ وتىرعانىن ەسكە سالىپ ءوتتى.

«سونىمەن قاتار رەسەي باعىتىنداعى شەكارامەن شەكتەس ۋچاسكەلەردىڭ اۆتوكولىك جولدارى قۇرىلىسىنا بايلانىستى بارلىق ماسەلەلەردى شەشەتىن بولامىز»، - دەدى ول.

اۆتور: رۋسلان عابباسوۆ