الماتى وبلىسىندا قانت قىزىلشاسىنىڭ القابى 2020 - جىلعا قاراي 10 مىڭ گەكتارعا جەتەدى
وبلىس باسشىسى ا. باتالوۆ زاۋىتتىڭ قۇرىلتايشىسى «ەكسيم اگرو» ج ش س ديرەكتورلار كەڭەسىنىڭ ءتوراعاسى نۇرلان تىلەۋبايەۆپەن بىرگە كوكسۋ قانت زاۋىتىندا جۇرگىزىلىپ جاتقان كۇردەلى جوندەۋ جۇمىستارىنىڭ بارىسىمەن تانىستى. زاۋىتتىڭ ازىق- تۇلىك، جوندەۋ، قىزىلشا وڭدەۋ سەكىلدى بىرنەشە سەحتارىن ارالادى. سول سياقتى زاۋىتتىڭ تەحنيكالارىن كورىپ، دايىندىق جۇمىستارىن پىسىقتادى.
زاۋىت ديرەكتورى التىنبەك اباتوۆتىڭ ايتۋىنشا، قازىرگى كەزدەگى كاسىپورىننىڭ كۇردەلى جوندەۋ جۇمىستارىنا 190 ادام جۇمىلدىرىلعان. كۇزگى ماۋسىمدا جۇمىسقا تاعى 600 ادام قابىلداناتىن بولادى.
مۇنان سوڭ ءوڭىر باسشىسى ا. باتالوۆ كوكسۋ اۋدانىنىڭ اۋماعىنداعى «قايرات» جانە «اليم- تايار» شارۋا قوجالىقتارىنىڭ القاپتارىن ارالادى.
«قايرات» ش ق 20 گەكتار جەرگە، ال «اليم- تايار» ش ق 68 گەكتارعا قانت قىزىلشاسىن سەپكەن. القاپتا ءونىم جايقالىپ ءوسىپ، بۇگىنگە دەيىن ءتاتتى ءتۇبىر 2 رەت شوپتەلىپ، 2 رەت سۋارىلىپ ۇلگەرگەن.
جالپى ەلباسىنىڭ تاپسىرماسىنا سايكەس، بيىل وبلىس بويىنشا قانت قىزىلشاسى القابىنىڭ كولەمى كوبەيتىلىپ، 4 مىڭ گەكتارعا سەبىلىپ وتىر. وسى جىلى كۇزدە كوكسۋ زاۋىتىنا شامامەن 100-120 مىڭ توننا شيكىزات وتكىزۋ مەجەلەنىپ وتىر. شارۋالاردىڭ جاقسى ءونىم الۋىنا مەملەكەت تاراپىنان بارلىق قولداۋلار جاسالىندى. ءتاتتى ءتۇبىردىڭ ءار گەكتارىنا ۇكىمەتتەن سۋبسيديا بەرىلدى. جەرگىلىكتى بيۋدجەتتەن 1 ميلليارد تەڭگەدەن استام قارجى ءبولىنىپ، قانت قىزىلشاسىنىڭ ساپالى تۇقىمى ساتىپ الىندى، سەرۆيستىك دايىنداۋ ورتالىقتارى قۇرىلىپ، شارۋاشىلىقتار قاجەتتى تەحنيكالارمەن قامتاماسىز ەتىلدى. شالعاي ورنالاسقان ەلدى مەكەندەردەن زاۋىتقا قانت قىزىلشاسىن تاسىمالداۋ ماسەلەسىن شەشۋ ءۇشىن «جەتىسۋ» كورپوراتسياسى ارقىلى كاماز اۆتوكولىكتەرى ساتىپ الىندى.
وبلىس اكىمى اماندىق باتالوۆ كوكسۋ اۋدانىنا جاساعان ساپارىنىڭ قورىتىندىسىندا جۋرناليستەرگە بەرگەن سۇحباتىندا:
- الماتى وبلىسى قانت قىزىلشاسىنا دەگەن قاجەتتتىلىگىن ءوز ونىمدەرىمەن وتەپ، ارتىلعانىن الماتى قالاسىنىڭ نارىعىنا شىعارۋى ءتيىس. ەلباسى الدىمىزعا قويعان وسى ماقساتتارعا جەتۋ ءۇشىن بيىلعى جىلى قانت قىزىلشاسىنىڭ القابى 4 مىڭ گەكتار بولسا، كەلەسى جىلى ونى 6-7 مىڭ گەكتارعا، 2020 - جىلعا قاراي 10 مىڭ گەكتارعا، ال شيكىزات كولەمىن 350 مىڭ تونناعا جەتكىزۋدى جوسپارلاپ وتىرمىز. ول ءۇشىن زاۋىت قۇرىلتايشىلارى بيىلعى جىلى قارجى قۇيىپ، كۇردەلى جوندەۋ جۇرگىزسە، كەلەسى جىلدان باستاپ قابىلدانىپ، وڭدەلگەن ءونىمنىڭ تابىسى ەسەبىنەن سەحتارداعى قۇرال- جابدىقتاردى جاڭالاۋ جۇمىستارىنا كوشپەكشى. سوندا ەڭبەك ونىمدىلىگى دە، تابىس تا ارتا تۇسەتىن بولادى، - دەدى.
