14:16, 28 - مامىر 2019 | GMT +5
سايلاۋ-2019: الەۋمەتتىك جەلىلەردە ۇگىت جۇرگىزۋ زاڭدى ما؟
نۇر-سۇلتان. قازاقپارات - «زاڭگەرلەر - ءادىل سايلاۋ ءۇشىن» رەسپۋبليكالىق قوعامدىق بىرلەستىگىنىڭ وكىلدەرى الەۋمەتتىك جەلىلەر ارقىلى ۇگىت-ناسيحات اقپاراتتارىن تاراتۋدىڭ قانشالىقتى زاڭدى بولاتىنىن ايتتى، دەپ حابارلايدى قازاقپارات ءتىلشىسى.
قازاقستان زاڭگەرلەر وداعىنىڭ ءتوراعاسى سەرىك اقىلبايدىڭ ايتۋىنشا، الەۋمەتتىك جەلىلەر مەن مەسسەندجەرلەر ارقىلى سايلاۋعا ۇگىتتەۋ زاڭمەن شەكتەلمەيدى.
«الەۋمەتتىك جەلىلەر، مەسسەندجەرلەر - قازىرگى ءومىردىڭ اجىراماس بولىگى. سوندىقتان بۇل قۇرالدار ارقىلى ۇگىتتەۋگە تىيىم سالىنبايدى. دەگەنمەن، ونداي اقپاراتتاردى تاراتۋ كەزىندە جالپىعا ورتاق ادەپتىلىك نورمالارىن ساقتاعان ءجون. سونداي-اق، ازاماتتاردىڭ وسى ماندەگى اقپاراتتاردى ارى قاراي الۋدان باس تارتۋ قۇقىعى ساقتالعانى ماڭىزدى» - دەدى زاڭگەر.
سەرىك اقىلباي الەۋمەتتىك جەلى ارقىلى ۇگىت ماتەريالدارىن تاراتۋ وزگە بۇقارالىق اقپارات قۇرالدارىنا ارنالعان ەرەجەمەن رەتتەلەتىنىن دە ەسكەرتتى.