شۋچينسك-زەرەندى تاس جولى 2019-جىلى پايدالانۋعا بەرىلەدى
جول جوباسى ءۇش لوتقا بولىنگەن: «0-30 شاقىرىم»، «30-47 شاقىرىم» جانە «47-80 شاقىرىم، ال، ونىڭ جالپى ۇزىندىعى ‒ 80 شاقىرىم. ەنى 3,5 مەتر جانە ەكى قوزعالىس جولاعىنان تۇراتىن تاس جول Ⅱ جانە Ⅲ ساناتقا جاتادى. قوزعالىستىڭ ەسەپتىك جىلدامدىعى - 100 شاقىرىم/ساع. جوبانىڭ جالپى قۇنى - 15,3 ميلليارد تەڭگە، 2017-جىلدىڭ جۇمىس قورىتىندىسى بويىنشا 7 ميلليارد قارجى يگەرىلسە، ال بيىل جول قۇرىلىسىنا 3,3 ميلليارد تەڭگە جۇمسالدى. اتالعان تاسجول قۇرىلىسىنىڭ باس مەردىگەرى - BI GROUP كومپانياسىنا قاراستى «قازاق دوستروي» ج ش س.
«قايتا جوندەۋ جۇمىستارىنىڭ ماقساتى - ەكى كۋرورتتىق ايماقتىڭ ءوزارا بايلانىسىن جاڭارتۋ جانە جاقىنداتۋ. قازىر جول كوكشەتاۋ ارقىلى وتەدى، بۇل 50 شاقىرىم. جاڭا جول قاشىقتىق پەن ۋاقىتتى ايتارلىقتاي قىسقارتادى. ولكە ەگىستى القاپ بولعاندىقتان، جوبا جەرگىلىكتى شارۋالاردىڭ تىلەكتەرىن ەسكەرە وتىرىپ ازىرلەندى. ۇزىندىعى 80 شاقىرىمدى قۇرايتىن تاس جول بويىندا 63 سۋ وتكىزەتىن قۇبىر، 2 دەمالىس الاڭى مەن 4 اۆتوبۋس پاۆيلونى، ودان بولەك 15 شاقىرىم قاردى ۇستايتىن جانە 14 شاقىرىم بارەرلىك قورشاۋ قاراستىرىلعان. اتالعان تاس جول زلاتوپولە، ساۆينكا، ۆەدەنوۆكا، م. عابدۋللين، سەرافيموۆكا جانە تاعى باسقا ەلدى مەكەندەردىڭ ۇستىنەن وتەدى»، - دەدى «قازاۆتوجول» ا ق اقمولا وبلىستىق فيليالى ديرەكتورىنىڭ ورىنباسارى امانگەلدى ءبىرىمجانوۆ باسپا ءسوز تۋرى بارىسىندا.
جول قۇرىلىسى الاڭىندا 784 ادام جانە 278 تەحنيكا جۇمىس ىستەۋدە. 2017-جىلدىڭ تامىزىندا باستالعان «شۋچينسك-زەرەندى» تاس جولى 2019-جىلدىڭ مامىر ايىندا پايدالانۋعا بەرىلەدى.
«جۇمىسىمىزدىڭ باستى قيىندىعى ‒ اۋا رايى، جاڭبىردىڭ وزىنەن ءار اي سايىن 10 جۇمىس كۇنىن جوعالتامىز. جۇمىستاردى تابىستى جۇرگىزۋگە ءبىزدىڭ قولىمىزدا بار پروگرەسسيۆتى تەحنولوگيالىق شەشىمدەر ىقپال ەتەدى. ەڭ الدىمەن، بۇل Trimble كومپانياسىنان 3D- نيۆەليرلەۋ جۇيەسى. ول ءوندىرىستى جەڭىلدەتەدى جانە جەدەلدەتەدى. بۇل رەتتە ۋاقىت پەن ماتەريالدى، ونىڭ ىشىندە جانار مايدى دا ۇنەمدەيدى. تەحنيكانىڭ جۇمىس كۇشىن ءتيىمدى قولدانۋ جۇمىس تيىمدىلىگىن %25 عا ءوسىردى سونىمەن قاتار، بىزدە جوعارى تەحنولوگيالىق زەرتحانا، GPS- ترەكينگ جۇيەسى جانە جىلجىمالى ۇساقتاۋ-سۇرىپتاۋ قوندىرعىلارى بار. سونداي-اق، ءبىز Lean قۇرالدارىن بەلسەندى قولدانامىز. مىسالى، اسفالتبەتوندى زاۋىتتاردى كارەرلەرگە جاقىن ورنالاستىرا وتىرىپ، ءبىز ماتەريالدى تاسىمالداۋ ۋاقىتىن ايتارلىقتاي قىسقارتتىق»، - دەدى BI GROUP كومپانياسىنا قاراستى «قازاق دوستروي» ج ش س شۋچينسك فيليالىنىڭ ديرەكتورى تولەگەن بەرەكەتوۆ.
ونىڭ ايتۋىنشا، تاس جولدىڭ بارلىق ءۇش لوتى بويىنشا تومەنگى (گرۋنتتى-مينەرالدىق قوسپا)، جوعارعى (ورگانيكالىق- مينەرالدىق قوسپا) جانە نەگىزگى قاباتىندا ءىرى تۇيىرشىكتى اسفالتوبەتوندى توسەۋ جۇمىستارى جۇرگىزىلدى.
ەسكە سالساق، بۇعان دەيىن وسى جىلدىڭ سوڭىنا دەيىن «ورتالىق-شىعىس» ءدالىزى بويىنشا استانا-پاۆلودار جانە پاۆلودار-سەمەي باعىتتارى بويىنشا تاس جولدىڭ پايدالانۋعا بەرىلەتىنىن ايتقان بولاتىنبىز.