ارنايى ەكونوميكالىق ايماقتاردا 2019 - جىلعا دەيىن 2 تريلليون تەڭگەنىڭ جوبالارى جۇزەگە اسادى - ءا. يسەكەشەۆ
ايتا كەتەرلىگى جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ارنايى ەكونوميكالىق ايماقتاردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭ جوباسى تالقىلانعان بولاتىن.
«بۇگنگى كۇنى ەلىمىزدى ون ەكونوميكالىق ايماق بار. يندۋستريالاندىرۋ باعدارلاماسىنىڭ العاشقى بەسجىلدىعى ىشىندە ولاردىڭ ينفراقۇرىلىمى تولىق قالىپتاستى. ناتيجەسىندە ينۆەستورلاردىڭ بەلسەندىلىگى ارتىپ، جوبالاردىڭ سانى دا كوبەيدى»، - دەدى مينيستر اسەت يسەكەشەۆ.
ونىڭ ايتۋىنشا قارالىپ وتىرعان زاڭ جوباسى ارقىلى ارنايى ەكونوميكالىق ايماقتا باسقارۋ جۇيەسىن جەتىلدىرىپ، ينۆەستيتسيالىق احۋالدى ارتتىرۋ كوزدەلەدى.
«يندۋستريالاندىرۋدىڭ ءبىرىنشى بەسجىلدىعى اياسىندا ارنايى ەكونوميكالىق ايماقتاردىڭ بارلىعىندا ينفراقۇرىلىم جاساقتاۋ قولعا الىندى نەمەسە ولاردىڭ ءبىرازىندا بۇل جۇمىس اياقتالۋ ساتىسىندا تۇر. 2019 - جىلعا قاراي اتىراۋ مەن پاۆلودار ارنايى ەكونوميكالىق ايماقتارىندا ينفراقۇرىلىم تولىق جۇزەگە اسادى. وسىنىڭ ارقاسىندا اەا (ارنايى ەكونوميكالىق ايماقتار) جوبالارمەن تولىعا تۇسپەك. قازىرگى تاڭدا اەا- تاردا ناقتى 130 جوبا جۇزەگە اسۋدا، سونداي- اق 90-نان استام جوبامەن جۇمىس بەلسەندى تۇردە جۇرگىزىلۋدە. مىسالعا الساق، 2009 - جىلى ارنايى ەكونوميكالىق ايماقتارداعى جوبالار سانى 20-عا جەتپەيتىن ەدى. ويتكەنى، ول تۇستا قاجەتتى ينفراقۇرىلىم دا بولمادى، ارنايى ەكونوميكالىق ايماقتاردى باسقارۋ جاعى دا ءالسىز بولدى»، - دەدى اسەت يسەكەشەۆ.
ءمينيستردىڭ سوزىنە قاراعاندا، ا ە ا ينفراقۇرىلىمىنا ۇلتتىق قور مەن بيۋدجەتتەن بولىنگەن قاراجات 261 ميلليارد تەڭگەنى قۇرادى. ال قازىرگە دەيىن سالىنعان ينۆەستيتسيالار مولشەرى 375 ميلليارد تەڭگەگە جەتىپ وتىر.
«بۇدان بولەك، 2019 - جىلعا دەيىن جەكە ينۆەستيتسيالار بويىنشا شامامەن 2 تريلليون تەڭگەنى قۇرايتىن جوبالار جۇزەگە اسىرىلماق. ال مۇنداعى بۇگىنگى ءوندىرىس كولەمى 816 ميلليون تەڭگەگە جەتىپ، 9 مىڭ 230 جۇمىس ورنى اشىلىپ وتىر»، - دەدى مينيستر.
اۆتور: قانات مامەتقازى ۇلى
