ەلوردالىق اففيناجدىق زاۋىت 2019 - جىلى 25 توننا التىن وندىرەتىن بولادى - فوتو
2012 - جىلعى 3 - شىلدەدە «استانا - جاڭا قالا» يندۋستريالىق پاركى اۋماعىندا «تاۋ- كەن التىن» ج ش س اففيناجدىق زاۋىتى قۇرىلىسىنىڭ باستالۋىنىڭ بەلگىسى - كاپسۋلا سالىنىپ، العاشقى دىڭگەگى قاعىلعان بولاتىن. 2013 - جىلعى 19 - جەلتوقساندا اتالعان زاۋىت ەلباسىنىڭ قاتىسۋىمەن ىسكە قوسىلدى.
جوبا قۇندى مەتالداردى اففيناجداۋ سالاسىنداعى الەمنىڭ ۇزدىك تەحنولوگيالارىنا سايكەس سالىندى. وسىعان بايلانىستى تەحنولوگيالىق پروتسەستە قولدانىلاتىن قوندىرعىمەن جيىنتىقتا تولىقتاي ەكولوگيالىق قاۋىپسىزدىكتى، قۇرامىنداعى قوسپالار مولشەرى جوعارى ساپاسى تومەن شيكىزات تۇرلەرىن قايتا وڭدەۋ مۇمكىندىگىن، تاۋار ءونىمىن تازارتۋدىڭ جوعارى دەڭگەيىن، تازالىعى كەم دەگەندە %99,99 دايىن ءونىم الۋدى قامتاماسىز ەتەتىن ەلەكتروحيميالىق ءادىس تەحنولوگياسى دا تاڭدالدى.
ديرەكتوردىڭ ەكونوميكا جانە قارجى جونىندەگى ورىنباسارى جانار راحيموۆانىڭ ايتۋىنشا، 2014 - جىلى زاۋىت قازاقستاننىڭ ۇلتتىق بانكىنە التىن ۆاليۋتا رەزەرۆىن تولىقتىرۋ ءۇشىن ساتىلعان 7 مىڭ تونناعا جۋىق التىندى اففيناجدادى. زاۋىتتىڭ 2015 - جىلعى جوسپارى - 10 توننا التىن مەن 10 توننا كۇمىس. الداعى ۋاقىتتا كاسىپورىن قۋاتتىلىعى 25 توننا التىن مەن 50 توننا كۇمىستى قۇرايتىن بولادى، بۇعان 2019 - جىلى قول جەتكىزىلمەك.
زاۋىتتا جالپى، 74 ادام، سونىڭ ىشىندە 56 سى وندىرىستە جۇمىس ىستەيدى. قايتا وڭدەۋگە ارنالعان شيكىزاتتى 29 جابدىقتاۋشى جەتكىزەدى. 20 توننا شيكىزاتتان ورتا ەسەپپەن 10 توننا تازا دايىن ءونىم شىعادى. شيكىزات قازاقستاننان عانا: قوستاناي، اقباقاي، قاراعاندى كەن ورىندارى مەن شىعىس قازاقستان وبلىسى اۋماعىنان الىنادى.
«شيكىزات زاۋىتقا كەلىپ تۇسكەننەن كەيىن ولشەنىپ، سىناما الىنادى. تالداۋ ناتيجەلەرى ماقۇلدانعان جاعدايدا، جابدىقتاۋشىعا اقى تولەنىپ، ماتەريال تەحنولوگيالىق پروتسەسكە تۇسەدى. كاسىپورىندا 7 يندۋكسيالىق پەش بار. ماتەريال قايتا بالقىتىلىپ، گوموگەندەلەدى، ناقتى تالداۋ ءۇشىن تاعى دا سىناما الىنادى. التىننىڭ قۇرامىنا بايلانىستى ماتەريال ەلەكتروحيميالىق اففيناجعا جونەلتىلەدى. بۇدان سوڭ كاتودتى التىن قايتادان التىنعا بالقىتىلادى. ودان ءارى تۇيىرشەكتەر يندۋكسيالىق پەشتەرگە سالىنىپ، بانك قۇيمالارى جاسالادى»، - دەيدى «تاۋ- كەن التىن» ج ش س باس تەحنولوگى اسقار تلەۋلين.
ءبىر قۇيما التىننىڭ سالماعى 12 ك گ، قۇنى - 500 مىڭ دوللار. بۇگىندە زاۋىتتا سالماعى 100 گرامنان 1 كيلوگرامعا دەيىنگى ولشەيتىن ينۆەستيتسيالىق قۇيمالاردى شىعاراتىن قوندىرعى بار. جاقىن ارادا حالىققا التىن مەن كۇمىس ساتۋ مۇمكىندىگى پايدا بولماق.
