قازاقستاندا 2018-جىلدىڭ سوڭىنا دەيىن ەڭبەك كىتاپشاسى الىنىپ تاستالادى
«قازىرگى ۋاقىتتا جۇمىس بەرۋشى مەن جۇمىس ىزدەۋشىنىڭ اراسىنداعى ىسكەرلىك قۇجاتتاردى جۇرگىزۋدىڭ وسىنداي امالى وتە ماڭىزدى. سەبەبى، ولاردىڭ ءبىرشاما بولىگى قاشىقتىقتا جۇمىس ىستەيدى. جۋىق ارادا ادامدارعا جۇمىسقا تۇرۋ ءۇشىن تەك جەكە كۋالىك عانا قاجەت بولادى. قالعان قۇجاتتار دەرەك قوردا ساقتالادى»، - دەپ حابارلادى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنەن.
بەلگىلى بولعانداي، بۇگىنگى كۇنى اتالعان قىزمەت جاڭارتىلعان enbek.kz سايتىنىڭ ەڭ كوپ كەزدەسەتىن تۇرىنە اينالعان. وسىلايشا، ەڭبەكتىڭ ەلەكتروندى بيرجا بازاسىندا سيفرلى فورماتتاعى جۇمىسشى پروفيلىن ەنگىزۋ جۇيەسى مەن ەڭبەك كەلىسىمشارتىنىڭ ەسەبى قۇرىلادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى جۇمىس بەرۋشىلەرگە جەكە ەلەكتروندى ىستەردى قۇرۋدى ۇسىنادى. جۇمىسقا تۇرۋ كەزىندە ادامدار قۇجاتتار پاكەتىن ۇسىنعان كەزدە ولاردىڭ ج س ن ءنومىرىن بىردەن جەكە مالىمەتتەردى وڭدەۋگە جىبەرۋ ۇسىنىلادى. وسىنىڭ ارقاسىندا جۇمىس بەرۋشى تەكسەرىلگەن ەلەكتروندى اقپاراتتى، ياعني سيفرلى جەكە ءىستى الا الادى. ارى قاراي ونلاين رەجىمدە جۇمىسشىنىڭ قۇزىرەتىن راستاۋعا بولادى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ناريمان مۇقىشەۆ مۇنداي امال-ءادىس قاعاز جۇزىندەگى اۋرەنى جويۋعا، ەڭبەك كىتاپشالارىنان باس تارتۋعا كومەكتەسەتىنىن ايتادى.
«وسى جۇيە جۇزەگە اسقان جاعدايدا قازاقستاندىقتار جۇمىسقا تەك جەكە كۋالىكپەن عانا كىرە الاتىنداي جاعداي جاسالادى. ديپلوم جانە مەديتسينالىق انىقتاما سەكىلدى باسقا دا قۇجاتتار مالىمەتتەر بازاسىندا ساقتالادى. ءبىز قۇجاتتاردى رەسىمدەۋ جۇمىسىن جەڭىلدەتىپ، جۇمىسشى مەن جۇمىس بەرۋشىنىڭ اراسىنداعى ءوزارا قارىم-قاتىناستى ەلەكتروندى فورماتقا اۋىستىرعىمىز كەلەدى. ماسەلەن، ەگەر ادام جۇمىستان شىعىپ قالسا، اۆتوماتتى تۇردە ونى ەڭبەكتىڭ ەلەكتروندى بيرجاسىنا شىعارا الامىز»، - دەيدى ن. مۇقىشەۆ.
ىسكە اسىرىلاتىن جۇيەنىڭ تيىمدىلىگىن تەكسەرۋ ءۇشىن پيلوتتى جوبا بيىل بۇكىل قازاقستاندا باستالىپ كەتكەن. ەلەكتروندى ەڭبەك كەلىسىمشارتىن تولىعىمەن 2019-جىلى ءوتۋ كوزدەلىپ وتىر. سونداي-اق، enbek.kz سايتىندا ءوزىن-ءوزى جۇمىسپەن قامتيتىن ازاماتتار ءۇشىن ەلەكتروندى تىركەۋ جۇيەسىن ەنگىزۋ جوسپارلانۋدا.
ەسكە سالا كەتسەك، بىلتىر ەڭبەك كەلىسىمشارتتارىن تىركەۋدىڭ ءبىرىڭعاي جۇيەسىن ەنگىزۋ قولعا الىندى. اتالعان جۇيە ازاماتتىڭ رەسمي جۇمىسى تۋرالى اقپارات بەرەدى. بۇل جوبا باستاپقىدا ءبىر وبلىستا ىلكى جوبا رەتىندە ىسكە اسىرىلىپ كەلدى.
