وليمپيادا-2018: بوكسشى ايبەك ورالباي التىن مەدال الدى

استانا. قازاقپارات - بۋەنوس- ايرەستە ءوتىپ جاتقان جاس وسپىرىمدەر وليمپياداسىندا قازاقستاندىق بوكسشى ايبەك ورالباي چەمپيون اتاندى، دەپ حابارلايدى قازاقپارات ءتىلشىسى.

ا. ورالباي 91 كەلى سالماقتا الجيرلىك موحاممەد امين حاسەدپەن كۇش سىناستى.

ايبەك ءۇش راۋند بويى قارسىلاسىن تىقسىرىپ، ۇزدىك ونەر كورسەتتى. بەس تورەشىنىڭ بارلىعى 30:27 ەسەبىمەن جەڭىستى ءبىراۋىزدان قازاقستاندىق بوكسشىعا بەردى.

وسىلايشا، قازاقستان قۇراماسى بوكستان دا التىن جۇلدەنى قورجىنعا سالدى.

بولاشاعىنان ۇلكەن ءۇمىت كۇتتىرەتىن 18 جاستاعى ا. ورالباي بيىل ازيا چەمپيوناتىندا التىننان القا تاقسا، الەم بىرىنشىلىگىندە كۇمىس جۇلدەگەر اتانعان ەدى.

ايبەكتەن كەيىن ىلە-شالا رينگكە بوكسشى قىزىمىز نادەجدا ريابەتس شىقتى. ول قىزدار ءۇشىن اۋىر سالماق بولىپ ەسەپتەلەتىن 75 كەلىدە تاعى ءبىر الجيرلىك يچراك چايبپەن قولا جۇلدە ءۇشىن تالاستى.

نادەجدا ريابەتس تە ەل ءۇمىتىن اقتاپ، الجيرلىكتەن ءبىر ءباس جوعارى تۇردى. بەس تورەشى تۇگەلدەي جەڭىستى ءبىزدىڭ سپورتشىنىڭ ەسەبىنە جازدى.

18 جاستاعى ن. ريابەتس 2014-جىلى جاس وسپىرىمدەر اراسىندا الەم چەمپيونى اتانسا، بيىل قوستانايدا ازيا بىرىنشىلىگىندە ۇزدىك شىققان ەدى. ەندى، مىنە، جاس وسپىرىمدەر وليمپياداسىندا قولا جۇلدەگە قول جەتكىزىپ وتىر.

ەسكە سالا كەتەيىك، بۇدان بۇرىن فينالدا رەسەيلىك الەكسەي درونوۆقا ەسە جىبەرگەن قازاقستاندىق بوكسشى دامير تويباي (91+ كەلى) كۇمىس جۇلدەگەر اتانعانىن جازعان بولاتىنبىز.

بوكستان قازاقستان قۇراماسى تاعى ءبىر التىن جۇلدەدەن ءۇمىتتى. تالعات شايكەن بۇگىن ساعات 23.15 شاماسىندا 64 كەلى سالماقتا رەسەيلىك يليا پوپوۆپەن فينالدىق كەزدەسۋگە شىعادى.

كەشە وليمپيادا التىنىن، سونىمەن قاتار ۆەلوسپورتتان قازاقستان ەرلەر كومانداسى دا ۇتىپ العان ەدى.

بۋەنوس-ايرەس استاناسى ارگەنتينادا 3- جازعى جاس وسپىرىمدەر وليمپياداسى 6-18- قازان ارالىعىندا وتەدى. وعان 206 مەملەكەتتەن 4 مىڭ سپورتشى قاتىسۋدا. جارىستار باعدارلاماسىنا سپورتتىڭ ءداستۇرلى 28 تۇرىنەن بولەك، سپورتتىق بيلەر (برەيك-دانس)، كاراتە، تاۋعا ورمەلەۋ، روليكپەن سىرعاناۋ قوسىلىپ وتىر.

بايراقتى دودادا ەل نامىسىن 58 سپورتشى قورعاۋدا.