وليمپيادا-2018: قازاقستاندىق سپورتشىلاردىڭ ءتورتىنشى جارىس كۇنگى ناتيجەلەرى

پحەنچحان. قازاقپارات - 12 -اقپان كۇنى وڭتۇستىك كورەيانىڭ پحەنچحان قالاسىندا ءوتىپ جاتقان وليمپيادا ويىندارى قازاق ەلى ءۇشىن ءساتسىز ءوتتى، دەپ حابارلايدى قازاقپارات ءتىلشىسى.

بۇگىن اپتانىڭ ءبىرىنشى جۇمىس كۇنى پحەنچحانداعى وليمپياداشىلارىمىزدان تاعى دا مەدال كۇتكەنىمىز جاسىرىن ەمەس. ول فريستايلدان ەرلەر اراسىندا سىنعا تۇسكەن دميتري رەيحەرد بولاتىن. الايدا، ول فينالدىق ەكىنشى كەزەڭدە قاتەلىكتەرگە بوي الدىرىپ، 58.64 ۇپايمەن 8-ورىنعا تابان تىرەدى.

سونداي-اق، جارىستىڭ وسى تۇرىنەن جارىس جولىنا شىققان تاعى ءبىر سپورتشىمىز پاۆەل كولماكوۆ 76.10 ۇپايمەن 7- ورىنعا يە بولدى. وسىلايشا قوس سپورتشىمىز ۇزدىكتەر قاتارىنان كورىنە المادى. ال بياتلوننان سىنعا تۇسكەن رومان ەرەمين جارىستى 52- ورىنمەن اياقتادى.

سونىمەن قاتار، كونكي سپورتىنان ايەلدەر اراسىندا 1500 مەترگە جۇگىرگەن ەكاتەرينا ايدوۆانىڭ جولىنا دا ۇمىتپەن قاراعان ەدىك. وكىنىشكە قاراي، ايدوۆا اتالعان قاشىقتىقتى 18- ورىنمەن اياقتادى.

بياتلوننان ەل نامىسىن قورعاعان سپورتشىمىز گالينا ۆيشنيەۆسكايا وليمپيادا ويىندارىن 20- ورىنمەن اياقتادى. ول ءىز كەسۋ مەن ماسس-ستارتتى جاقسى مەڭگەرگەنىن كورسەتە ءبىلدى. بارلىق وق اتۋ شەبىندە ءمىنسىز ونەر كورسەتتى. تۋرا وسى سىندا سايىسقا تۇسكەن ەكىنشى وتانداسىمىز داريا كليمينا 57- ورىنعا جايعاستى.

سونداي-اق، وليمپيادا ويىندارىندا تاۋ شاڭعى سپورتىنان ماريا گريگوروۆا باق سىنايتىن بولعان. وكىنىشكە قاراي، پحەنچحانداعى اۋا رايىنىڭ قولايسىزدىعىنا بايلانىستى بۇل سايىس ءتۇرى 15 -اقپانعا قالدىرىلدى. وسىلايشا، قازاقستاندىق سپورتشىلار 12- اقپاندا مەدالعا قول جەتكىزە العان جوق.

ەستەرىڭىزگە سالا كەتەيىك، قازاقستان قورجىنىنا فريستايلشى يۋليا گالىشەۆا العاشقى قولا مەدالدى سالعان بولاتىن.

 كۇنسۇلتان وتارباي