قىران-2018: ون ءۇش جاستاعى بۇركىتشى باس جۇلدەنى جەڭىپ الدى-فوتو
الماتى يپپودرومىندا ءۇش كۇننەن بەرى ساياتشىلىق ونەردى جاڭعىرتقان قۇسبەگىلەردىڭ «قىران - 2018» رەسپۋبليكالىق تۋرنيرى بۇگىن مارەسىنە جەتتى.
قىراندار سايىسىنا ەلىمىزدىڭ 10 ولكەسىنەن 50-دەن استام ساياتشى كەلدى. سونىمەن قاتار، موڭعوليادان دا كەلىپ، ونەر كورسەتكەن قانداستارىمىز تۋرنيردىڭ مەرەيىن ارتتىردى. سايىس قورىتىندىسى بويىنشا 13 جاستاعى بۇركىتشى بەكسۇلتان سەيىتجان ءبىرىنشى ورىن الىپ، 200 مىڭ تەڭگەلىك سىيلىققا يە بولدى.
«قىرانىم حان ءتاڭىردىڭ ارقاسىندا جەڭىسكە جەتتىم. وڭاي بولمادى. ورىن الۋ ءۇشىن كوپ ەڭبەكتەندىم. قولىما قىران قۇستى قوندىرعانىما 5 جىل بولدى. ءبىرىنشى ورىندى كەز كەلگەن قۇس الا بەرمەيدى عوي. مۇنىڭ الدىندا كوكشەتاۋداعى جارىسقا قاتىسقام. وكىنىشكە وراي، قوياننان الدانىپ قالىپ، فينالعا وتە الماي قالعام. كەلەسى جىلى دا وسىنداي جۇلدەنى الامىن دەپ ويلايمىن. ءوزىم ەڭبەكشىقازاق اۋدانىنان كەلدىم»، - دەدى جاس بۇركىتشى قازاقپارات ءتىلشىسىنىڭ ساۋالىنا جاۋاپ بەرىپ.
رەسپۋبليكالىق تۋرنيردىڭ ەكىنشى ورىن جۇلدەسىن الماتىلىق عابيت تاڭات (150 مىڭ تەڭگە) ەنشىلەسە، ءۇشىنشى ورىنعا مۇراتحان داۋلەتحان (100 مىڭ تەڭگە) يە بولدى. 4, 5, 6- ورىنداردى ءوزارا ارمانبەك كۇنتۋعان، باقداۋلەت باباجان، الماس سەيتجان ءبولىسىپ، اقشالاي سىيلىقتارعا يە بولدى.
ايتا كەتەيىك، سايىستىڭ ءبىرىنشى كۇنى، ىرىكتەۋ كەزەڭىندە ساياتشىلار كورەرمەندەرگە قۇستى قولعا قوندىرۋ، شىرعا تارتۋ سياقتى ونەرلەرىن كورسەتتى. ال، كەلەسى كەزەڭگە وتكەن بۇركىتتەر قويان مەن تۇلكىگە تۇسسە، قارشىعا مەن يتەلگىلەر قولعا شاقىرىلىپ، كوگەرشىن اۋلادى.
اتالعان سپورت ءتۇرى الماتىدا العاش رەت 1988 -جىلى كورشىلەس قىرعىز، تۇركىمەن ەلدەرىنىڭ قاتىسۋىمەن وتكەن بولاتىن.
اۆتور: الماس مۇقاش ۇلى
