قىتايلىق تۋريستەر 2017-جىلى قازاقستانعا قانشا قارجى قالدىردى؟

استانا. قازاقپارات - قىتاي تۋريستەرى ءۇشىن ەنگىزىلگەن 72 ساعاتتىق ۆيزاسىز رەجىم ءوزىنىڭ تيىمدىلىگىن كورسەتتى.

بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتتى، دەپ حابارلايدى قازاقپارات.

«2018-جىلدىڭ سوڭىنا دەيىن قىتاي ازاماتتارى ءۇشىن ىلكى رەجىمدە ەنگىزىلگەن ۆيزاسىز 72 ساعاتتىق ترانزيتتىك جوبا ءوز تيىمدىلىگىن كورسەتتى. ەكسپو وتكەن ءۇش ايدىڭ ىشىندە 4,5 مىڭ قىتايلىق كەلىپ، ەلىمىزدىڭ ەكونوميكاسىنا ءارقايسىسى 250-300 دوللاردان قالدىردى»، - دەدى ول.

ءمينيستردىڭ ايتۋىنشا، تاياۋ ۋاقىتتا مۇنداي رەجىمدى بۇگىندە ەكونوميكاسى قارقىندى دامۋ جولىنا ءتۇسىپ، حالقى تۋريستىك ساپارمەن ءجيى شىعا باستاعان ءۇندىستان ازاماتتارىنا دا ەنگىزۋ جوسپارلانىپ وتىر.

«بۇل تۋرالى مەملەكەتتىك ورگاندارمەن كەلىسىلۋ ۇستىندە. دەگەنمەن، ءبىز بۇل ماسەلەنى مىندەتتى تۇردە شەشۋىمىز قاجەت دەپ ويلايمىن. سەبەبى ءۇندىستان قارقىندى دامىپ كەلەدى»، - دەدى ارىستانبەك مۇحامەدي ۇلى.

جالپى ءمينيستردىڭ دەرەگىنشە، سوڭعى 10 جىلدا تۋريزم جىلدام قارقىنمەن دامىپ، الەمدىك ەكونوميكاداعى ەڭ سەرپىندى ورلەي تۇسكەن سالالاردىڭ بىرىنە اينالدى. بۇگىندە تۋريزم الەمدىك ىشكى جالپى ءونىمنىڭ 10 پايىزىن قۇراپ، ءاربىر 10-جۇمىس ورنىن قۇرۋدا. دۇنيە جۇزىندە تۋريزم سالاسىنا قۇيىلاتىن ينۆەستيتسيا كولەمى 800 ميلليارد دوللارعا جەتىپ وتىر.

اۆتور:   مارلان جيەمباي