ەكسپو-2017 كورمەسىنىڭ جابىلۋ سالتاناتىندا ەرەكشە اكسيا ءوتتى - فوتو

استانا. قازاقپارات - ەكسپو-2017 حالىقارالىق مامانداندىرىلعان كورمەسىنىڭ جابىلۋ سالتاناتىندا «ادام قۋاتى» دەپ اتالاتىن ەرەكشە اكسيا ۇيىمداستىرىلدى، دەپ حابارلايدى قازاقپارات ءتىلشىسى.

سالتاناتتى كەشتە ەلباسىدان باستاپ قول ۇستاسقان قوناقتار ءبىر-بىرىنە قۋات بەرۋ ارقىلى سفەراعا جارىق سىيلادى. كەش قوناقتارىنان بولەك، قول ۇستاسقان ءبىر جارىم مىڭعا جۋىق ەرىكتى كونگرەسس-حوللدان ەكسپو-2017 كورمەسىنىڭ باستى سيمۆولى - «نۇر الەمگە» دەيىن ساپ ءتۇزدى.

ولاردىڭ كەۋدەلەرىندەگى ەكسپو-2017 كورمەسىنىڭ باستى بويتۇمارى دا بىرىنەن كەيىن ءبىرى جانىپ، شارعا جەتتى. بۇل تىزبەكتىڭ 2232 ادامنان قۇرالۋىندا دا ۇلكەن ءمان جاتىر - ەكسپو-2017 كورمەسى تۇتاس 2232 ساعاتقا جالعاسقان ەدى. تىزبەك سوڭىندا تۇرعان كورمەنىڭ باستى كەيىپكەرى - كىشكەنتاي بالاقاي تولاسسىز ەنەرگيامەن قۋاتتانىپ، سفەراعا قولىن تيگىزگەن ساتتە اينالا جارقىراپ شىعا كەلدى.

بۇل بىرلىكتىڭ، بەرەكەنىڭ، سارقىلماس قۋاتتىڭ بەلگىسىن بىلدىرسە كەرەك. وسىلايشا، استانا اسپانىندا تۇمانباي مولداعاليەۆ پەن نۇرعيسا تىلەنديەۆتىڭ «قۇستار ءانى» اۋەلەپ، الىپ شاردا بەينەلەنگەن بەيبىتشىلىك قۇسى كوككە، كۇللى الەمگە قانات سامعادى.

بۇل - بيىككە تالپىنعان جاسامپاز قازاق ەلىنىڭ نىشانى ەدى. كورمەنىڭ جابىلۋ سالتاناتىنىڭ رەسمي بولىگى اياقتالىپ، امفيتەاترداعى مەرەكەلىك كونسەرتكە ۇلاستى. وندا DJ Timofei مەن نۇربەرگەن ماحامبەتوۆ، Americano, Holliwood قاتارلى توپتار كورمە مەيماندارىنا كوتەرىڭكى كوڭىل-كۇي سىيلاۋدا.

كونسەرتتىك باعدارلاما امفيتەاتردا 21:00-23:10 ارالىعىندا ۇيىمداستىرىلادى. ساعات 22:00 دە بيلەتتەردىڭ ساتىلىمى قايتا جاندانىپ، قالالىقتار مەن شاھار قوناقتارى تۇنگى 02:30 عا دەيىن كورمەلەردى ارالاي الادى. بۇل ۋاقىت ارالىعىندا حالىقارالىق پاۆيلوندار وزدەرىنىڭ كونسەرتتىك باعدارلامالارىن ۇسىنادى.

كورمە كەشەنىندەگى مەيرامحانالار مەن تاماقتانۋ ورتالىقتارى دا 22:00 دەن 02:30 عا دەيىن جۇمىس ىستەيدى.

ەسكە سالا كەتسەك، ەكسپو-2017 حالىقارالىق مامانداندىرىلعان كورمەسى استانادا 2017-جىلدىڭ 10- ماۋسىمىندا باستالعان بولاتىن. ونداعى «بولاشاق ەنەرگياسى» تاقىرىبى ەنەرگەتيكا سالاسىنىڭ قازىرگى جاھاندىق ماسەلەلەرىن قامتيدى. كورمەگە بالامالى ەنەرگيا كوزدەرى سالاسىنداعى جاڭا تەحنولوگيالاردى ۇسىنعان 115 مەملەكەت جانە 22 حالىقارالىق ۇيىم قاتىستى.

ءۇش ايدا ەكسپو-2017 كورمەسىنە 4 ميلليونعا جۋىق قوناق كەلدى. كورمە 11- قىركۇيەك كۇنى ساعات تۇنگى 03:00 كەزىندە جۇمىسىن توقتاتادى.