ەكسپو-2017 «عارىش» سىيلىعىنىڭ جەڭىمپازى انىقتالدى
«عارىش» سىيلىعى - جاپوندىق ەكسپو-90 حالىقارالىق قورى مەن حالىقارالىق كورمەلەر بيۋروسىنىڭ الەۋمەتتىك جوباسى بولىپ سانالادى. ەكسپونىڭ تۇتاس تاريحىندا بەسىنشى رەت تابىستالعان بۇل سىيلىق «بولاشاقتىڭ ەنەرگياسى» سالاسىنداعى ۇزدىك يننوۆاتسيالىق جوبانى انىقتاۋعا باعىتتالعان.
وسىلايشا، الەمنىڭ تۇپكىر-تۇپكىرىنەن كەلىپ تۇسكەن وتىنىمدەر اراسىندا لەسوتو ستۋدەنتتەرىنىڭ كۇن قۋاتىن جينايتىن جوباسى ۇزدىك دەپ تانىلدى. ەكسپودا وتكەن ۇزدىك قاتىسۋشىلاردى ماراپاتتاۋ راسىمىندە حالىقارالىق كورمەلەر بيۋروسى باس ديرەكتورىنىڭ ورىنباسارى دميتري كەركەنزەس ەكسپو-2017 لەسوتو كوميسسارىنا «عارىش» سىيلىعى مەن 20 مىڭ ەۋرو اقشالاي سىيلىق سەرتيفيكاتىن تابىس ەتتى.
لەسوتو ۇلتتىق ۋنيۆەرسيتەتى - اۋىلدىق جەرلەرگە ارنالعان جاڭارتىلاتىن ەنەرگيا تەحنولوگياسىن دامىتىپ كەلە جاتقان اكادەميالىق-زەرتتەۋ ينستيتۋتى. ونداعى ستۋدەنتتەر ويلاپ تاپقان كۇن ەنەرگياسىن جينايتىن ارزان قۇرىلعى اۋىلدىق جەرلەردە اس دايىنداپ، ءۇي جىلىتۋعا مۇمكىندىك بەرەدى. ءادىلقازىلار جاسىل تەحنولوگيالاردى دامىتۋ ارقىلى از قامتىلعان وتباسىلاردىڭ تۇرمىسىن جاقسارتۋعا جانە قورشاعان ورتانى قورعاۋعا سەپتىگىن تيگىزەدى دەپ ەسەپتەيدى.
ەسكە سالا كەتسەك، بۇگىن حالىقارالىق كورمەلەر بيۋروسى ەكسپو-2017 كورمەسىن وتكىزۋگە اتسالىسقان تۇلعالارمەن ۇيىمداردى جانە ۇزدىك پاۆيلونداردى ماراپاتتادى. وندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ ەكسپو-2017كورمەسىن جوعارى دەڭگەيدە وتكىزۋگە تىكەلەي اتسالىسقانى ءۇشىن حالىقارالىق كورمەلەر بيۋروسىنىڭ التىن مەدالىمەن ماراپاتتالدى.
ەكسپو-2017 كورمەسىن تابىستى وتكىزۋدە ايانباي ەڭبەك ەتكەن «استانا ەكسپو-2017» ۇ ك» ا ق ۇجىمى، استانا قالاسىنىڭ اكىمدىگى جانە ەرىكتىلەر ءتۇرلى ماراپاتقا يە بولدى. كورمەنىڭ تاقىرىبىن اشا بىلگەن جانە ۇزدىك ديزاينىمەن ەرەكشەلەنگەن گەرمانيا، شۆەيتساريا، ق ح ر، سينگاپۋر جانە ماجارستان جانە وزگە دە مەملەكەتتەردىڭ پاۆيلوندارى التىن، كۇمىس جانە قولا جۇلدەلەردى يەلەندى.
اۆتور: ايجان سەرىكجان قىزى
