عارىشتان تۇسىرىلگەن ەكسپو-2017 كورمەسىنىڭ قۇرىلىسى تۋرالى روليك شىقتى - كەسكىن

استانا. قازاقپارات - جەردى قاشىقتىقتان زوندتايتىن قازاقستاندىق عارىش اپپاراتى KazEOSat-1 جانە فرانتسۋزدىڭ Airbus Defense and Space كومپانياسىنىڭ «پلەيادى» عارىش اپپاراتى 2015 جانە 2017-جىلدار ارالىعىندا استانا قالاسىنداعى «ەكسپو-2017» حالىقارالىق مامانداندىرىلعان كورمەسىنىڭ قۇرىلىسىن عارىشتان تۇسىرگەن.

ق ر قورعانىس جانە اەروعارىش ونەركاسىبى مينيسترلىگىنىڭ باسپا ءسوز قىزمەتى وسى تۋرالى ۆيدەو-روليك تاراتتى، دەپ حابارلايدى قازاقپارات.

جالپى «ەكسپو-2017» قۇرىلىس الاڭىنان 21 عارىش ءفوتوتۇسىرىلىمى جۇرگىزىلگەن، ونىڭ 14 ءىن «پلەيادى»، 7 ءۋىن «KazEOSat-1» ءتۇسىردى.

وسىعان وراي، قازاقستاندىق جانە فرانتسۋز ماماندارى بىرلەسە وتىرىپ عارىش اپپاراتتارى ارقىلى الىنعان فوتو ءتۇسىرىلىم مالىمەتتەرىنەن ۆيدەوروليك جاساپ شىقتى.

وندا استاناداعى «ەكسپو-2017» قۇرىلىسى قالاي جۇزەگە اسقانى كورسەتىلەدى.

ايتا كەتەيىك، KazEOSat-1 (Kazakhstan Earth Observation Satellite) - جەردى قاشىقتىقتان زوندتايتىن العاشقى قازاقستاندىق سپۋتنيك. ول 1 مەترگە دەيىنگى (پانحروماتيكالىق رەجيمدە) جانە 4 مەترگە دەيىنگى (مۋلتيسپەكترالدىق رەجيمدە) فوتوتۇسىرىلىمدەر جاساي الادى.