ەكسپو-2017: الەمگە ايگىلى ۇلدار حورى قازاقستاننىڭ ءانۇرانىن ورىندادى - كەسكىن
وسىعان وراي، شاتىرلى كونسەرت زالىندا سالتاناتتى شارا ۇيىمداستىرىلدى. سول جەردە قازاقستانعا العاش رەت كەلگەن الەمگە ايگىلى ۇلدار حورى كونسەرت بەردى، دەپ حابارلايدى قازاقپارات ءتىلشىسى.
سالتاناتتى شارا باستالماس بۇرىن ەكى ەلدىڭ ءانۇراندارى شىرقالدى. ونى الەمگە ايگىلى «اۋليە فلوريان» اتتى ۇلدار حورى ورىندادى. حوردىڭ كوركەمدىك جەتەكشىسى فرانس فارنبەرگەردىڭ ايتۋىنشا، قازاقستان رەسپۋبليكاسىنىڭ ءانۇرانىن جاتتاۋعا كوپ ۋاقىت كەتكەن جوق.
سەبەبى گيمنىڭ اۋەزدى اۋەنى بىردەن ەستە قالادى.
«مەن الدىمەن ترانسكريپتسياسىن جاسادىم. ءسويتىپ، بالالاردى ۇيرەتتىم. ون كۇننىڭ ىشىندە ءبىز قازاقستاننىڭ ءانۇرانىن جاتتاپ شىقتىق. اۋەنى جاقسى، ول جاعىنان قيىندىق بولعان جوق. ءسوزدى جاتتاعاندا ءسال-ءپال قينالدىق. ءبىز استاناعا العاش رەت كەلىپ وتىرمىز. بالالاردىڭ بارلىعى وسى كۇندى اسىعا كۇتتى. كەشە بىزدە دەمالىس بولدى. سول كەزدە استانانى ارالاپ شىقتىق. بالالارعا قالانىڭ ساۋلەتى، ءزاۋلىم عيماراتتارى قاتتى ۇنادى»، - دەدى فارنبەرگەر قازاقپارات تىلشىسىنە بەرگەن سۇحباتىندا.
ايتا كەتكەن ءجون، ۇلدار حورى اۆستريانىڭ ورتالىعىندا ورنالاسقان اۋليە فلوريان موناستىرىندە 1041-جىلى قۇرىلعان بولاتىن. اتالعان حور وسى ەلدىڭ باستى برەندى بولىپ سانالادى. وسى ۋاقىتقا دەيىن شىعارماشىلىق ۇجىم الەمنىڭ ءبىراز مەملەكەتتەرىندە بولدى.
