ەكسپو-2017 اشىلۋ سالتاناتى: لۋكاشەنكو ۇلىمەن بىرگە كەلدى
سولاردىڭ ىشىندە بەلارۋس پرەزيدەنتى الەكساندر لۋكاشەنكو سالتاناتتى شاراعا ۇلىمەن بىرگە كەلدى، دەپ حابارلايدى قازاقپارات ءتىلشىسى.
مەملەكەت باسشىسى بارلىق مارتەبەلى مەيمانداردى قازاقستاننىڭ «نۇر الەم» پاۆيلونىندا قارسى الىپ، فوتوعا ءتۇستى. بەلارۋس پرەزيدەنتى حاتتامالىق قارسى الۋ راسىمىنە الەكساندر لۋكاشەنكو ءوزىنىڭ ۇلى - نيكولايمەن بىرگە كەلدى.
ايتا كەتەرلىگى، ادەتتەگى حاتتاما بويىنشا فوتوعا تەك پرەزيدەنتتەر عانا تۇسەتىن-ءدى. سوعان سايكەس، لۋكاشەنكونىڭ ۇلى بىردەن قوناقتار جايعاساتىن ورىنعا قاراي بەت الدى. بەلارۋس باسشىسى ارتىنا قاراپ، ءوز ۇلىن شاقىرىپ كوردى.
وسىدان كەيىن نۇرسۇلتان نازاربايەۆتىڭ ءوزى نيكولايعا قول بۇلعاپ، فوتوعا تۇسۋگە شاقىردى. ءسويتىپ، بەلۋراس پرەزيدەنتىنىڭ ۇلى - نيكولاي لۋكاشەنكو ەكى پرەزيدەنتتىڭ جانىنا تۇرىپ، فوتوعا ءتۇستى.
ايتا كەتكەن ءجون، بەلارۋس باسشىسى الەكساندر لۋكاشەنكو كىشى ۇلى نيكولايدى ۇنەمى وزىمەن بىرگە ەرتىپ جۇرەدى. نيكولاي 12 جاسقا تولماي جاتىپ ۆلاديمير پۋتين، دميتري مەدۆەدەۆ، ميشەل مەن باراك وبامامەن، ءتىپتى ەكى بىردەي ريم پاپاسى - بەنەديكت XVI جانە فرانتسيسكپەن كەزدەسىپ ۇلگەرگەن.
