مالايزيا ەكسپو-2017 كورمەسىنە ۇلتتىق كوبەلەكتەرىن الىپ كەلمەك
بۇل تۋرالى بۇگىن استانادا مالايزيا پاۆيلونىنىڭ كوميسسارى، ەنەرگەتيكا، جاسىل تەحنولوگيا جانە سۋ رەسۋرستارى مينيسترلىگىنىڭ باس حاتشىسى، دوكتور زايني ۋدجانگ ءمالىم ەتتى، دەپ حابارلايدى قازاقپارات.
«ءبىز «جاسىل» دامۋ مەن وسىمدە كىشكەنتاي قادامدار ۇلكەن قوزعالىستىڭ باستاۋى بولاتىنىنا سەنەمىز. ول «كوبەلەك اسەرى» دەپ اتالادى. سوندىقتان سىزدەر مالايزيا پاۆيلونىندا كوپ كوبەلەك كورەسىزدەر. ءبىزدىڭ كوپتەگەن شارالارىمىز سوعان بايلانىستى بولماق. اسىرەسە مالايزيا جەرىندە مەكەن ەتەتىن ءبىزدىڭ ۇلتتىق كوبەلەگىمىزگە قاتىستى شارالار كوپ. وسى مازمۇندى الەمگە تاراتقىمىز كەلەدى. ياعني، «كوبەلەك اسەرى» دەگەن - كىشكەنتاي ىستەر جەر شارىنىڭ وزگە ءبىر بولىگىندە ۇلكەن تولقىندارعا الىپ كەلۋى ىقتيمال. وسىنداي شاعىن قادامدار «جاسىل» ەكونوميكانىڭ بارشا الەمدە دامۋىنا قاتتى اسەر ەتۋى مۇمكىن. ءبىز بارلىقتارىڭىزدى «جاسىل» بولاشاقتى بىزبەن بىرگە قۇرۋعا شاقىرامىز»، - دەدى ول ورتالىق كوممۋنيكاتسيالار قىزمەتىندە وتكەن بريفينگتە.
ونىڭ سوزىنشە، مالايزيا كۇن ەنەرگياسىن بەرەتىن پانەلدەردى كوپتەپ شىعارۋدا جانە 2030-جىلعا قاراي كۇن ساۋلەسىنەن الىناتىن ەنەرگيانىڭ ۇلەسىن 21 پروتسەنتكە جەتكىزۋدى كوزدەيدى.
پاۆيلون كوميسسارىنىڭ ايتۋىنشا، ەكسپو-2017 كورمەسى كەزىندە مالايزيا تەك «جاسىل» تەحنولوگيالاردا عانا ەمەس، حالال-يندۋستريادا، يسلام قارجىلاندىرۋ جۇيەسىندە قول جەتكىزگەن جەتىستىكتەرىن دە پاش ەتپەك. ەكسپو-2017 كورمەسىندەگى مالايزيا پاۆيلونى 10- ماۋسىم كۇنى ەسىگىن اشادى.
مالايزيا پاۆيلونى اۋدانى جاعىنان ەڭ ءىرى پاۆيلونداردىڭ ءبىرى (732 شارشى مەتر) جانە ورنالاسقان جەرى بويىنشا قولايلى بولىپ سانالادى. ول ءۇندىستان مەن قىتاي ەلدەرىنىڭ پاۆيلوندارى ورتاسىندا ورنالاسىپ، ەكى ەل اراسىنداعى بايلانىستىرۋشى كوپىر قىزمەتىن اتقارىپ، ءوزىن ازيانىڭ دامۋىنداعى الار ورنىن كورسەتپەك.
«مالايزيا دايىن. بىرنەشە اي بويى اتقارىلعان قارقىندى جوسپارلاۋ مەن دايىندىقتان كەيىن مالايزيانىڭ جاسىل تەحنولوگيالارىنىڭ مۇمكىندىكتەرىن كورسەتۋ ءۇشىن مالايزيالىق پاۆيلون الەمگە ءوز ەسىگىن اشادى. ءبىز جاسىل ەكونوميكاعا قىزىعۋشىلىق تانىتاتىن بارلىق ادامداردى ەكسپو 2017 اياسىندا مالايزيا پاۆيلونىن تاماشالاۋعا شاقىرامىز. مالايزيا بۇكىل الەمدى جاسىل ەكونوميكانى دامىتۋ ءۋشىن ىنتالاندىرۋعا اتسالىسادى جانە الداعى 13 اپتا بويى ءبىز وسىمەن اينالىساتىن بولامىز»، - دەدى ۋدجانگ.
مالايزيا پاۆيلونى جاسىل ەكونوميكانىڭ دامۋىنداعى ەلدىڭ جەتىستىكتەرىن كورسەتەتىن جانە قىزىعۋشىلىق تانىتقان ەلدەردىڭ ىسكەرلىك ورتاسىمەن بايلانىس ورناتۋ الاڭى بولادى. سونىمەن قاتار، قوناقتار مالايزيانىڭ مادەنيەتى جانە ەلدىڭ تۋريستىك كورىكتى جەرلەرىمەن جاقىنىراق تانىسا الادى.
مالايزيا پاۆيلونى ەلدىڭ حالال- ونەركاسىبىنىڭ دامۋىنداعى جانە يسلام «جاسىل قارجىلاندىرۋ» سەكتورىنداعى دۇنيە جۇزىنە تانىلعان جەتىستىكتەرىن كورسەتەدى. مالايزيانىڭ قارجى ينستيتۋتتارى شاريعات قاعيدالارىنا نەگىزدەلگەن «جاسىل» يننوۆاتسيانى قولدانۋ سالاسىنداعى كوشباسشى بولىپ سانالادى.
اۆتور: جاسۇلان جولدىبايەۆ
