ەكسپو-2017: شي جينپيڭ قىتايلىق پاۆيلوندى كورىپ قايتتى-فوتو
سول جەردە ق ر پرەزيدەنتى نۇرسۇلتان نازاربايەۆ قىتايلىق دەلەگاتسياعا، سونىڭ ىشىندە ق ح ر ءتوراعاسى شي جينپيڭگە ءوز العىسىن جەتكىزدى، دەپ حابارلايدى قازاقپارات ءتىلشىسى.
«قۇرمەتتى شي جينپيڭ مىرزا، ءسىزدى استاناداعى ەكسپو-2017 حالىقارالىق كورمەسىندە قارسى الۋعا قۋانىشتىمىن. مەنىڭ شاقىرۋىمدى قابىل الىپ، قازاقستان ءۇشىن، جالپى الەم ءۇشىن وسىناۋ اسا ماڭىزدى شاراعا ءوزىڭىزدىڭ كەلىپ قاتىسىپ وتىرعانىڭىزعا شىن العىسىمدى بىلدىرەمىن. ەكسپو - ەنەرگەتيكانى دامىتۋ سالاسىنداعى تاجىريبەمەن الماساتىن تاماشا الاڭ. قىتاي ءبىرىنشى بولىپ وسى كورمەگە قاتىساتىنىن راستادى. ال «بولاشاق ەنەرگياسى - جاسىل جىبەك جولى» تاقىرىبىنداعى ەكپوزيتسياسى ءىرى پاۆيلونداردىڭ بىرىنە جاتادى. قىتاي حالىق رەسپۋبليكاسى بالامالى قۋات كوزدەرى سالاسىندا الەم كوشباسشىسى بولىپ سانالادى»، - دەدى نۇرسۇلتان نازاربايەۆ.
2020-جىلعا دەيىن قىتاي وسى سالاعا شامامەن 360 ميلليارد دوللاردى جۇمساۋدى كوزدەيدى. بۇل - بارلىق مەملەكەتتەردىڭ ىشىندەگى ەڭ ۇلكەن كورسەتكىش.
«مەن بىلەمىن، سىزدەردىڭ ەكسپو كورمەسىنە قاتىسۋىڭىز تەحنولوگيالىق قارىم-قاتىناستى عانا ەمەس، مادەني بايلانىستاردى دا كۇشەيتە تۇسەدى»، - دەپ اتاپ كورسەتتى ەلباسى.
ايتا كەتەيىك، بۇگىن قازاقستان پرەزيدەنتى نۇرسۇلتان نازاربايەۆ پەن قىتاي حالىق رەسپۋليكاسىنىڭ ءتوراعاسى شي جينپيڭ ليانيۋنگان تەڭىز پورتى جانە «قورعاس - شىعىس قاقپاسى» ارنايى ەكونوميكالىق ايماعى اراسىنداعى كونتەينەرلىك قىزمەتتى ىسكە قوستى.
اتالعان جوبا قازاقستاننىڭ «نۇرلى جول» باعدارلاماسى مەن قىتايدىڭ «جىبەك جولىنىڭ ەكونوميكالىق بەلدەۋى» باستاماسىن ۇندەستىرۋدىڭ تاعى ءبىر ايقىن كورىنىسى بولسا كەرەك.
اۆتور: ارمان اسقاروۆ
