ەلگە ورالعان قانداسىمىز وسكەمەننەن ەكسپو-2017 كورمەسىنە جاياۋ كەلە جاتىر

 استانا. قازاقپارات - حالىقارالىق «ەكسپو-2017» كورمەسىن قولداۋ ماقساتىندا وسكەمەننەن ەلورداعا جاياۋ جول تارتقان عالىمجان توقتار ەكىباستۇزعا ايالداپ، تۇرعىنداردى قالانىڭ 60 جىلدىق مەرەيتويىمەن قۇتتىقتادى، دەپ حابارلايدى pavlodarnews.kz.

ەكىباستۇز قالالىق دەنە شىنىقتىرۋ جانە سپورت ءبولىمىنىڭ باس مامانى تالعات ساكەننىڭ سوزىنشە، بۇگىن وسكەمەن وبلىستىق سپورت باسقارماسىنىڭ ماماندارى سپورتشىنىڭ قالا اۋماعىنا جەتكەنىن ايتقان. «مارافونشىمەن ەكىباستۇز قالاسىنىڭ شەتىندەگى ستەللادا كەزدەسىپ، سۇحباتتاستىق. سپورتشى قالا تۇرعىندارىن بيىلعى 60  جىلدىق مەرەيتويىمەن قۇتتىقتاپ، سپورتتا زور جەتىستىكتەرگە جەتۋىمىزدى تىلەدى. قالا شەتىنە تۇسكى ساعات 12 كەزىندە كەلگەن ول شامامەن 10-15 مينۋتتاي ايالداعان سوڭ پاۆلودار- استانا اۆتوجولىمەن ءارى قاراي كەتتى. جۇگىرىسىن 10-ماۋسىم كۇنى استانادا اياقتايدى. سوندا بارلىعى 1000 شاقىرىم جولدى جاياۋ باعىندىرماق» ، - دەيدى تالعات ساكەن. عالىمجان توقتار وسكەمەن قالاسىنداعى حالىققا قىزمەت كورسەتۋ ورتالىعىندا ينسپەكتور بولىپ جۇمىس ىستەيدى. ول «ەكسپو-2017» كورمەسىنىڭ قۇرمەتىنە وراي استاناعا دەيىن جاياۋ جۇگىرىپ بارۋ ءۇشىن 26 - مامىر كۇنى جولعا شىققان. كۇنىنە 10 ساعات جۇگىرىپ، شامامەن 60-70 شاقىرىم جولدى ارتقا تاستايدى. اۋا رايى قولايلى بولسا، 80 شاقىرىمعا دەيىن جەتكىزەتىنىن ايتقان. ال، سپورتشىنىڭ ايەلى ەركەگۇل مۇقيات بولسا، كولىكپەن ىلەسىپ، بارلىق جول بارىسىن بەينەتىركەگىشكە تۇسىرەدى.