استانادا بايگەدەن «ەكسپو-2017» كۋبوگى وتەدى
بايگە 11-ماۋسىم كۇنى استاناداعى «قازانات» اتشابارىندا وتەدى. بۇل تۋرالى ۇلتتىق سپورت قاۋىمداستىعىنىڭ باسپا ءسوز قىزمەتى حابارلادى.
بۇل كۇنى جانكۇيەر قاۋىم بايگەنىڭ بىرنەشە ءتۇرىن تاماشالايتىن بولادى.
اتاپ ايتار بولساق، الدىمەن 25 شاقىرىمدىق قاشىقتىقتا الامان بايگەنىڭ سايگۇلىكتەرى باق سىنايدى. 2,4 جانە 1,8 شاقىرىمدا ۇشقىر اتتاردىڭ جارىسى بولادى. ودان سوڭ 15 شاقىرىم قاشىقتىققا توپ بايگەنىڭ تۇلپارلارى سىنعا تۇسپەك.
قۇنان بايگەنىڭ باسەكەسى - 7 شاقىرىم. ەڭ سوڭىندا تايپالعان جۇرىسىنەن سۋ توگىلمەس جورعا جارىس تاماشالانادى. جورعا جارىستىڭ قاشىقتىعى - 7 شاقىرىم.
مىنە، قازاقستان رەسپۋبليكاسىنىڭ پرەزيدەنتى ن. نازاربايەۆ جۇلدەسىنە ارنالعان «ەكسپو-2017» كۋبوگىندا تالاي جارىستا ماڭدايى جارقىراعان تاڭداۋلى جۇيرىكتەر بايگەنىڭ التى تۇرىنەن سىنعا تۇسەدى.
بايگە قىزىعىن ەلباسىنىڭ ءوزى تاماشالايدى دەپ جوسپارلانعان. بۇل ايتۋلى جارىستارعا بەس شەت مەملەكەت پەن ەلىمىزدىڭ بارلىق وڭىرلەرىنىڭ سايگۇلىكتەرى قاتىسادى دەپ كۇتىلۋدە.
سونداي-اق، كەشە اتالمىش بايگەنىڭ بيلەتتەرى ساتىلىمعا شىققانى بەلگىلى بولدى.
اۆتور: كۇنسۇلتان وتارباي
