ەكسپو-2017: گەرمانيا پاۆيلونىندا ۇيلەر مەن بالدىرلاردان ەنەرگيا الىنادى - فوتو
عالىمداردىڭ كورمەگە شىعارىلعان ءبىرقاتار تۋىندىلارى بۇگىندە تۇرمىس-تىرشىلىكتىڭ اجىراماس بولىگىنە اينالدى.
ماسەلەن، 1855-جىلى پاريج كورمەسىنە قويىلعان كوفە قايناتقىش ماشينا، 1929-جىلدىڭ جاڭالىعى بولعان ەسكالاتور، 1939-جىلى شىققان تەلەديدار مەن ءتۇرلى ءتۇستى سۋرەتتەر، ەلەكتر شامدارى، سەنسورلى ەكراندار، تەلەفون مەن راديو -بۇكىل الەمدىك ەكسپو كورمەلەرىندە جاڭالىق رەتىندە تانىستىرىلعان.
بۇگىن استانادا « ەكسپو-2017» مەديا-ورتالىعىندا وتكەن گەرمانيا پاۆيلونىنىڭ تانىستىرىلىمىندا دا ەكى جانە ءتورت دوڭگەلەكتى زاماناۋي ەلەكتر كولىكتەرى، ءوزى تۇتىناتىن ەنەرگيادان دا كوبىرەك قۋات وندىرە الاتىن اقىلدى ۇيلەر مەن ەنەرگيا الۋعا بولاتىن بالدىرلى قاسبەتتىك پانەلدەر سەكىلدى بىرنەشە جاڭا جوبالار كورسەتىلدى.
«بولاشاق ەنەرگياسى» اتتى مامانداندىرىلعان كورمەدە گەرمانيا پاۆيلونى تابيعات كۇشتەرى ۇسىنعان مۇمكىندىككە جانە وسى تابيعات كۇشتەرىن قالاي پايدالانۋ قاجەتتىگىنە ەرەكشە توقتالادى.
ەنەرگيانى ءوندىرۋ، ساقتاۋ جانە تاراتۋدىڭ «اقىلدى» تاسىلدەرى مەن يننوۆاتسيالىق تەحنولوگيالارى «دۇرىس ەنەرگيا» ۇرانىمەن ۇسىنادى. گەرمانيا پاۆيلونىندا ەلەكتروموبيلدەرگە ايرىقشا نازار اۋدارىلعان.
سەبەبى، جاڭعىرتىلاتىن كوزدەردىڭ ەنەرگياسىنان قۋات الاتىن ەلەكتر كولىكتەرىمەن ءجۇرۋ مۇمكىندىگى - كليماتقا زالال تيگىزبەيتىن جاڭا كولىك ءتۇرىن جاساپ شىعارۋعا سەپتىگىن تيگىزدى.
مۇندا ليمۋزين، «ە فورمۋلاسى» جارىس اۆتوكولىگى، ەلەكتر قوزعالتقىشى بار ەكى دوڭگەلەكتى كولىك قۇرالدارى جانە زاماناۋي قۋاتتاۋ جۇيەلەرى تانىستىرىلادى. سونداي-اق، كورمەدە گەرمانيا پاۆيلونى وزدەرى تۇتىناتىن ەنەرگيادان دا كوبىرەك ەنەرگيا وندىرەتىن ۇيلەردى ۇسىنادى.
جاڭا گەرمانيالىق (ءتيىمدى ءۇي پليۋس) ەنەرگيا ستاندارتى سىرتتان قاراعاندا اۋدارىلعان ابستراكسيالى ءۇي بولىپ كورىنەدى، بۇل قۇرىلىس سالاسىنداعى پاراديگمانىڭ وزگەرۋىن بىلدىرەدى.
ال ونىڭ ىشىنەن، قوناقتار جاڭا «Efficiency House Plus» ستاندارتىنا سايكەس عيماراتتىڭ قالاي جۇمىس ىستەيتىنىن كورە الادى. فوتوگالۆانيكالىق قوندىرعى مەن قورشاۋ جانە جابۋ قۇرىلىمدارى ەنەرگيالىق تيىمدىلىكپەن قامتاماسىز ەتەدى، سايكەسىنشە ادامزات تاريحىندا العاش رەت تۇرعىن ۇيلەر ءوزى تۇتىناتىن مولشەردەن دە كوپ قۋات وندىرەدى.
پاۆيلونداعى گەرمانيانىڭ ۇلكەن كارتاسىندا ەنەرگيا تيىمدىلىگى ستاندارتىنىڭ جاڭا تالاپتارىنا ساي كەلەتىن 35 كورنەكى جوبا كورسەتىلگەن. پاۆيلونداعى تاعى ءبىر ەرەكشە ەكسپونات - ەنەرگيا تۇتىنۋدى ازايتاتىن «اقىلدى ءۇي».
SmartHome ەكسپوناتى جابىق جەرگە ورنالاسادى، كەلۋشىلەر ىشكە ەسىك ارقىلى كىرەدى. ءۇي ءىشى ادەتتەگىدەي تەرەزە، كىر جۋعىش ماشيناسى، توڭازىتقىش، كوفە قايناتقىش قۇرىلعىسى بار اس ءۇي جانە ەلەكترلى ويىن-ساۋىق جۇيەلەرى بار قوناق بولمەسى تۇرىندە گرافيكالىق كوللاجبەن بەزەندىرىلگەن.
ەلەكتروندى قۇرال كومەگىمەن كەلۋشىلەر جەكە وبەكتىلەردى ىسكە قوسىپ، SmartHome جۇيەلەرىنىڭ جىلۋدى، جارىقتى، پەردەشەلەردىڭ قوزعالۋىن جانە ت. ب. قالاي باسقاراتىنىن كورۋگە بولادى. پاۆيلوننىڭ ءبىر بۇرىشى بالدىر بيورەاكتورىنىڭ ۇلگىسىنە ارنالادى. مۇندا پاۆيلون قوناقتارى بالدىر تولى قاسبەتتەر تۋرالى تولىعىراق بىلە الادى.
ماسەلەن، گامبۋرگ قالاسىنداعى تۇرعىن ۇيلەرگە بالدىر سالىنعان قاسبەتتىك پانەلدەر ورناتىلعان، پاۆيلوندا بالدىردى اعىندى سۋلارمەن قامتاماسىز ەتۋدەن جانە ونىڭ فوتوسينتەز ارقىلى وسۋىنەن باستاپ كۇن ەنەرگياسىن پايدالانۋعا جانە بالدىر كوبىگىن جيناۋعا دەيىن تۇسىندىرىلەدى.
بۇل جوعارى ساپالى بيوماسسانى تاماق جانە كوسمەتيكا وندىرۋدە جانە تاعى دا باسقا سالالاردا پايدالانۋعا بولادى. سونىمەن قاتار، گەرمانيالىق پاۆيلوندا پلاستيك ءوندىرىسىن تۇبەگەيلى وزگەرتىپ جىبەرەتىن ءالى دە دامىتىلۋ ۇستىندەگى بولاشاق تەحنولوگياسى ۇسىنىلادى.
اتاپ ايتقاندا، مۇناي مەن تابيعي گازدى پايدالانباي-اق، سۋ جانە كومىرقىشقىل گازىنان پلاستيك جاساۋعا بولاتىن Power-to-X ءادىسى كورسەتىلەدى. ماشينا ۇلگىسىندەگى ەكسپونات يننوۆاتسيالىق تەحنولوگيانىڭ نەگىزدەرىن قىسقاشا تۇسىندىرەدى جانە ۆيرتۋالدى كەڭىستىكتە كەلۋشىلەرگە ءبىر تۇيمەشەنى باسۋ ارقىلى ەرگەجەيلى نەمەسە فۋتبول اياق كيىمى سىندى فورمالاردى جاساۋىنا مۇمكىندىك بەرەدى.
ايتا كەتەيىك، شەتەلدىك ەكسپو قاتىسۋشىلارى اراسىندا ەڭ ءىرى پاۆيلون گەرمانياعا تيەسىلى. پاۆيلون اۋماعى 1700 شارشى مەتردى الىپ جاتىر، وندا كورمە ايماقتارى، VIP- ايماقتار، نەمىس حالقىنىڭ ۇلتتىق تاعامدارى مەن سۋسىندارىن ۇسىناتىن مەيرامحانالار، گەرمانيا تۋرالى كادەسىيلار مەن بازارلىقتار ساتىلاتىن دۇكەندەر جانە كەڭسەلىك (قىزمەتتىك) بولمەلەر بولادى.
سونىمەن بىرگە، پاۆيلوندا 80 ادام جۇمىس ىستەيتىن بولادى. قىزمەتكەرلەردىڭ %75 قازاقستاندىقتار بولسا، قالعان %25 گەرمانيادان كەلەدى. 12- شىلدە كۇنى ەكسپو اۋماعىندا گەرمانيانىڭ ۇلتىق كۇنى اتالىپ وتەدى.
اۆتور: ايجان سەرىكجان قىزى
