ازيادا-2017: كەرلينگتەن قازاقستان ايەلدەر قۇراماسى قولا مەدال ءۇشىن سىنعا تۇسەدى

ساپپورو. قازاقپارات - جاپونيانىڭ ساپپورو قالاسىندا ءوتىپ جاتقان VIII قىسقى ازيا ويىندارىندا كەرلينگتەن قازاقستان ايەلدەر قۇراماسى فينالعا شىعا المادى، دەپ حابارلايدى ساپپورودان قازاقپارات ءتىلشىسى.

جارىستىڭ 1/2 فينالىندا وتانداستارىمىز وڭتۇستىك كورەيا قۇراماسىنان جەڭىلىپ قالدى، ەسەپ - 3:15. ەندى جەرلەستەرىمىز قولا مەدال ءۇشىن جاپونيامەن تارتىسادى. ال فينالدا وڭتۇستىك كورەيا قىتاي قۇراماسىمەن كەزدەسەدى.

ەستەرىڭىزگە سالا كەتەيىك، كەشە كەرلينگتەن قازاقستاننىڭ ەرلەر قۇراماسى سوڭعى ويىنىن قىتايلىق تايبەي قۇراماسىنا قارسى وتكىزىپ، 13:2 ەسەبىمەن ويسىراي ۇتىلعان بولاتىن. جالپى كەرلينگتەن ەرلەرىمىز ازيادادا بەس ويىن وتكىزىپ، كاتارلىقتارمەن وتكەن ويىندا عانا قارسىلاستارىن 12:4 ەسەبىمەن ۇتىپ، قالعان تورتەۋىندە جەڭىلىس تاپتى.

ەڭ العاشقى جارىستا قىتاي قۇراماسىمەن جولىعىپ، 12:1 ەسەبىمەن جەڭىلىس تاپسا، ەكىنشى ويىندا وڭتۇستىك كورەيا ەلىنە دە 12:1 ەسەبىمەن ويسىراي جەڭىلدى. ال ءۇشىنشى ويىندا شارشى الاڭ قوجايىندارىنا 13:4 ەسەبىمەن جول بەردى. ەندى سپورتتىڭ بۇل تۇرىنەن قىزدارىمىز قولا مەدال ءۇشىن بارىن سالادى دەگەن ۇمىتتەمىز.

اۆتور: كۇنسۇلتان وتارباي