رەسپۋبليكالىق «قانسونار 2017»: ارمان قوشقاروۆتىڭ بۇركىتى ءبىرىنشى ورىندى جەڭىپ الدى
اتىراۋ وبلىسىندا اراعا توعىز جىل ۋاقىت سالىپ ەكىنشى مارتە وتكىزىلىپ وتىرعان تۋرنيرگە اتىراۋ، جامبىل، اقتوبە، قىزىلوردا وبلىسىنان، جانە كوكشەتاۋ، پاۆلودار، الماتى، استانا قالالارىنان جيىرما بۇكىتشى، ءتورت قارشىعا قاتىستى، دەپ جازادى dodasport.kz.
بۇركىتشىلەر اراسىنداعى سايىس تۋرنيردىڭ ەكىنشى كۇنى قىزا ءتۇستى. ساياتشىلار بۇركىتتەرىن قويان، قارساق، قاسقىرعا سالىپ جارىسقا تۇسىرسە، قارشىعالار قويان، كەپتەر اۋلاۋمەن باعىن سىنادى. اقتىڭ كەزەڭگە اتىراۋلىق ارمان قوشقاروۆتىڭ «نارىن» اتتى بۇركىتى مەن اقمولا وبلىسىنان كەلگەن بەرگەنباي تاستانبەك ۇلىنىڭ بۇركىتى ءوتىپ، قاسقىر اۋلاۋدان سىنعا تۇسكەن بولاتىن. بۇل سىندا قوس بۇركىت تە يەسىن جەرگە قاراتپادى.
الايدا، تورەشىلەردىڭ ساراپتاۋى ناتيجەسىندە الدىڭعى كەزەڭدەردە جيناعان جوعارى ۇپايىمەن اتىراۋلىق ارمان قوشقاروۆتىڭ «نارىن» اتتى بۇركىتى ءبىرىنشى ورىندى، اقمولالىق بەرگەنباي اقتامبەك ۇلىنىڭ بۇركىتى ەكىنشى ورىندىەنشىلەدى. ال، استانا قالاسىنان كەلگەن رۋسلان ماعزوموۆ ءۇشىنشى ورىندى قاناعات تۇتتى.
سونداي-اق، قارشىعاشىلاردىڭ تۋرنيرىندە جامبىل وبلىسىنان كەلگەن 15 جاسار سەرىكبولسىن جالعاس ۇلى قارشىعا سالۋدان «ەڭ جاس ساياتشى» اتالىمىنا يە بولدى. بۇل سايىستا اتىراۋلىق اقبەرەن قۇرمانعالييەۆ ءۇشىنشى ورىندى، الماتى وبلىسىنىڭ قارشىعاشىسى ايات سەيىتجان ەكىنشى ورىن جەڭىپ الدى. قارشىعاسى بارلىق كەزەڭدەردەن جوعارى ۇپايمەن وتكەن جامبىل وبلىسىنىڭ تۋماسى باۋىرجان شەرنيازعا ءبىرىنشى ورىن بۇيىردى.
قارشىعاشىلارعا العان جۇلدەلەرىنە قاراي ۇلتتىق سپورت تۇرلەرى اتىراۋ وبلىستىق كلۋبى اتىنان 50 مىڭ، 30 مىڭ، 20 مىڭ تەڭگە كولەمىندە سىياقى تابىس ەتىلدى. ال، بۇركىتشىلەر 250 مىڭ، 150 مىڭ جانە 100 مىڭ تەڭگەنىڭ سەرتيفيكاتىنا يە بولدى.
- رەسپۋبليكالىق تۋرنير ويداعىداي ءوتتى. ەكى ايدان استام ۋاقىت دايىندالدىق. بۇركىتشىلەر سايىسىن الداعى ۋاقىتتا دا وتكىزۋگە بولادى. وعان اتىراۋدىڭ جەرىندە ەشقانداي قولايسىزدىق جوق، - دەيدى اتىراۋ وبلىسىنىڭ ۇلتتىق سپورت تۇرلەرى كلۋبىنىڭ باس باپكەرى ابدىكارىم قوشقاروۆ.
