قىتاي ەكسپو-2017 كورمەسىنە بەلسەندى ءارى جۇيەلى دايىندالۋدا - قازاقستاننىڭ قىتايداعى ەلشىسى
بۇل تۋرالى قازاقستاننىڭ قىتايداعى ەلشىسى شاحرات نۇرىشەۆ ايتتى، دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.
«مەن وسىعان دەيىن ەكسپو-2017 كورمەسىنە قاتىساتىنىن 112 ەل مەن 18 حالىقارالىق ۇيىم راستاعاندىعىن ايتقان بولاتىنمىن. ولاردىڭ اراسىندا ءوزىنىڭ بەلسەندىلىگىمەن جانە جۇيەلى جۇمىستارىمەن قىتاي ەرەكشەلەنىپ تۇر. بۇل ەل وكىلدەرى وسى كەزدە وزدەرىنىڭ كورمەگە قاتىساتىندارىن راستاپ، ۇلتتىق كوميسسارلارىن تاعايىنداپ، پاۆيلوندى بەرۋ جونىندەگى كەلىسىمگە قول قويىپ قانا قويماي، ءوزىنىڭ تۇجىرىمداماسىن، كۇنبە- كۇن ناقتى كورسەتىلگەن باعدارلاماسىن دا كورسەتىپ، ۇلتتىق پاۆيلوندا ارلەۋ جۇمىستارىن باستادى»، - دەدى ول ەكسپو-2017 كورمەسىندەگى پاۆيلونىن تانىستىرۋ كەزىندە جۋرناليستەردىڭ ساۋالدارىنا جاۋاپ بەرىپ تۇرىپ.
ديپلومات شانحايدا ەكسپو-2010 كورمەسىن وتكىزىپ جانە وزگە دە حالىقارالىق كورمەلەرگە قاتىسۋ تاجىريبەسىنىڭ ارقاسىندا قىتاي پاۆيلونى استانادا وتەتىن ەكسپو كەزىندە قالىڭ كوپشىلىكتىڭ نازارىندا بولاتىنان ايتتى.
«ايتا كەتەيىن، قازاقستان قىتايدىڭ الداعى كورمەگە قاتىسۋىنا ۇلكەن ماڭىز بەرىپ وتىر جانە ۇيىمداستىرۋ جۇمىستارىنىڭ بارلىعىنىڭ شەشىلۋىنە بارىنشا قولداۋ كورسەتۋدە»، - دەدى ول.
نۇرىشەۆ بيىلعى جىلدىڭ ماۋسىم ايىندا ق ح ر ءتوراعاسى شي جينپيننىڭ ق ر پرەزيدەنتى نۇرسۇلتان نازاربايەۆپەن بىرگە ەكسپو-2017 كورمەسىنىڭ اشىلۋ راسىمىنە قاتىسۋى جونىندە كەلىسىم بار ەكەندىگىن اتاپ ءوتتى.
ديپلومات ەكسپو-2017 كورمەسىنە قىتايدىڭ ەنەرگياۇنەمدەۋشى جانە «جاسىل» تەحنولوگيالار، بالامالى ەنەرگەتيكا مەن وزگە دە يننوۆاتسيالىق ونىمدەر وندىرۋمەن اينالىساتىن الدىڭعى قاتارلى كومپانيالارى ونىمدەرىن ۇسىناتىندىعىنا سەنىم ءبىلدىردى.
