نۇرسۇلتان نازاربايەۆ «استانا ەكسپو-2017» حالىقارالىق كورمەسى نىساندارىندا بولدى
سونداي- اق، قازاقستان پرەزيدەنتى الجير، قاتار، قىتاي، مالايزيا، ءۇندىستان ەلدەرىنىڭ ەكسپوزيتسياسى ورنالاساتىن حالىقارالىق پاۆيلوندارمەن تانىستى. سوڭىندا ەلباسى كەڭەس وتكىزىپ، وندا «استانا ەكسپو-2017» ۇلتتىق كومپانياسى» اكتسيونەرلىك قوعامىنىڭ باسقارما ءتوراعاسىنىڭ حالىقارالىق كورمەگە ازىرلىك بارىسى تۋرالى بايانداماسىن تىڭدادى. - قازىرگى ۋاقىتتا 112 ەل كورمەگە قاتىساتىنىن راستادى، سونىڭ ىشىندە 104 ەل وزدەرىنىڭ كوميسسارلارىن تاعايىندادى. 94 كەلىسىمگە قول قويىلىپ، 75 مەملەكەت ۇلتتىق كۇنىن وتكىزۋ ءۇشىن ناقتى داتانى الدىن الا بەلگىلەدى، - دەدى ا. ەسىموۆ.
كەڭەس بارىسىندا نۇرسۇلتان نازاربايەۆقا ارناۋلى حالىقارالىق كوميسسيا ىرىكتەپ العان ەنەرگەتيكا سالاسىنداعى ۇزدىك 24 جوباعا قاتىستى شەشىم جونىندە مالىمدەلدى.
بۇل جوبالار كورمەنىڭ ارناۋلى پاۆيلونىندا ۇسىنىلاتىنى اتاپ ءوتىلدى. - ەكى جىلدا اسا اۋقىمدى جۇمىس اتقارىلدى. ەندى بۇل نىسانداردى جابدىقتاپ، ءتيىستى كادرلاردى دايارلاۋىمىز قاجەت. بۇل - باستى مىندەت، ءبىز ونى باقىلاۋدا ۇستايتىن بولامىز، - دەدى مەملەكەت باسشىسى.
قازاقستان پرەزيدەنتى كەڭەس قورىتىندىسى بويىنشا پرەمەر- مينيسترگە «استانا ەكسپو-2017» ۇلتتىق كومپانياسى» اكسيونەرلىك قوعامىمەن جانە استانا قالاسى اكىمدىگىمەن بىرلەسىپ، حالىقارالىق مامانداندىرىلعان كورمە اياقتالعاننان كەيىن ونىڭ نىساندارىن ءارى قاراي پايدالانۋ ماسەلەسىن پىسىقتاۋدى تاپسىردى.
